ياسمين عز: السنجل في نعمة لا يعرفها إلا المتزوجون.. خليك فرعون زمانك
قالت الإعلامية ياسمين عز: «النهارده إجازة، لو أنت قاعد دلوقتي على الكنبة بتتفرج عليَّ، ومفكر إن العمر جرى بيك وملحقتش تتجوز ولا تعمل عيلة، افتكر إن فيه راجل متجوز، في نفس اللحظة، قاعد على الكنبة زيك، ومراته مشغلة المكنسة جنبه، مزيكة حسب الله، وبتلف حواليه، وشوية وهتقعد جنبه تقوله: وريني تليفونك، ومين بعتتلك على الإنستجرام أول امبارح، وتفتش في التليفون، وده وضع أنت متحبش تكون فيه».
وأضافت، خلال حلقة اليوم من برنامج «كلام الناس» المذاع عبر شاشة إم بي سي مصر: «ده في الوقت اللي أنت قاعد فيه، فرعون زمانك أحمد ونساؤه 99، وعلى الطرف الآخر محمد زميلك بيتفتش في تليفونه كل ربع ساعة.. حب حياتك، ونادي على اللي عندك في البيت يجيبوا ليك حتة شيكولاتة أو جاتوه، أو يعملوا لك كوباية شاي تسكر بيها على قلبك المليان، لأن المتجوز مش لاقي معلقة نظيفة يقلب بيها كوباية الشاي، ده لو عندهم شاي أصلًا، لأن النهارده مش يوم إجازة في حياة الراجل، معندناش الكلام ده.. لا، ده يوم التنفيض العالمي بتاع شيماء، وتشغيل الغسالة، والسلاحف تتنطط حواليك، ويقولوا: هات يا بابا فلوس، عايزين إندومي وأقساط المدرسة، وفي الآخر يسألوك: أنت مبتقعدش معانا ليه وتخش تنام؟ ما هو من الهم اللي بيشوفه في الإجازة يا شيماء، هيقعد ليه يعني؟».
وتابعت: «إياك تحزن لو أنت سنجل، أنت في نعمة لا يعلمها إلا المتزوجون. احمد ربنا إن عندك كنبة، فيه واحد غيرك مطلق، ومراته مجرجراه في المحاكم، وواخدة منه الكنبة، وقول الحمد لله الذي خلقنا أحرارًا، وخليك سنجل أعزب».
وفي سياق سابق، قالت الإعلامية ياسمين عز: «الجو النهاردة تراب مخلوط بهواء واليومين دول الجو متقلب وصعب جدا ودرجه الحرارة الصبح وصل 40 وبالليل بتنزل لـ 20 ممكن تلاقي رياح ورمال ومطر هو في ظاهرة اسمها ظاهرة النينيو.. مش المنيو لا أنت سمعتيها المنيو علشان أنت جعانة لكن دي ظاهرة مهمة والمنظمة العالمية للأرصاد الجوية بتحذر منها».
ظاهرة جوية مناخية بنتاثر بيها عالميا في بعض السنوات
ومن جانبها كشفت الإعلامية منار غانم منارعضو المركز الاعلامي بهيئة الأرصاد الجوية عن هذه الظاهرة، خلال مداخلة هاتفية لها في برنامج «كلام الناس» المذاع عبر شاشة ام بي سي مصر، قائلة: «هي ظاهرة جوية مناخية بنتاثر بيها عالميا في بعض السنوات وبتفضل في مدة حوالي من 9 لـ 12 شهر بتبدا من شهر خمسة ومستمرة معانا خلال فتره الصيف والخريف والشتاء».
