ياسمين عز عن واقعة الطبيب المزيف: هل ممكن أكون بتعالج عند حد وطلع مش طبيب؟!
قالت الإعلامية ياسمين عز: «عندنا هنا جرّاح قلب مشهور اتقبض عليه، لأنه أصلًا مش دكتور، ومش جرّاح، ولا مشهور، ومدخلش كلية الطب أصلًا، ودرس في السن، وياريت اتخرج، ده اتفصل من الجامعة، ومالوش علاقة بالطب. بعدها قال: بلا دراسة ولا تعليم، وراح مزوّر بطاقة على إنه طبيب بشري ورئيس قسم جراحات القلب في جامعة عين شمس، يعني مش دكتور على الضيق، لا ده رئيس قسم البلد إن شالله، ما حد حوش».
وأضافت، خلال حلقة اليوم من برنامج «كلام الناس» المذاع عبر شاشة «إم بي سي مصر»: «يعني إيه واحد مش دكتور كان مسؤول عن علاج مرضى قلب، ومحدش عارف مين عايش ومين مات؟ وبما إنه كان مزور كبير، هل في أي ضحايا ولا الموضوع إيه؟ طب كان في عمليات جراحية، ولا الموضوع كان كبير عليه شوية؟ المزور اتقبض عليه وهو بيجدد بطاقته، وهو مجدد أربع بطاقات من 2015، ومحكوم عليه بالسجن 10 سنين بالتزوير».
وتابعت: «نقابة الأطباء قالت إنه مش مدرج في السجلات، وجامعة عين شمس نفت إن له أي علاقة بالجامعة. سؤالي هو: أي حد يقدر يفتح عيادة؟ لو أنا الصبح قررت أكون حكيمة عيون أو قلب، هل ينفع أفتح عيادة؟ هو مفيش رقابة من وزارة الصحة؟ مش في تفاصيل وإجراءات قبل فتح العيادة؟ كل العملية دي عدّت إزاي؟».
واختتمت: «في قصص لازم نعرف دي إيه وإزاي. هل ممكن أكون أنا أو غيري، أو حد مننا، روحنا نتعالج عند حد وطلع ساقط ومش دكتور، ومعاه ابتدائية؟».
وفي سياق متصل، قالت الإعلامية ياسمين عز: «الجو النهاردة تراب مخلوط بهواء، واليومين دول الجو متقلب وصعب جدًا، ودرجة الحرارة الصبح وصلت لـ40، وبالليل بتنزل لـ20. ممكن تلاقي رياح ورمال ومطر. هو في ظاهرة اسمها ظاهرة النينيو.. مش المنيو، لا، أنتِ سمعتيها المنيو علشان أنتِ جعانة، لكن دي ظاهرة مهمة، والمنظمة العالمية للأرصاد الجوية بتحذر منها».
ومن جانبها، كشفت الإعلامية منار غانم، عضو المركز الإعلامي بهيئة الأرصاد الجوية، عن هذه الظاهرة خلال مداخلة هاتفية لها في برنامج «كلام الناس» المذاع عبر شاشة «إم بي سي مصر»، قائلة: «هي ظاهرة جوية مناخية بنتأثر بيها عالميًا في بعض السنوات، وبتستمر لمدة من 9 إلى 12 شهرًا، وبتبدأ من شهر مايو، ومستمرّة معانا خلال فترات الصيف والخريف والشتاء».
