ياسمين عز: إحنا متشبثين بالحياة وكل فترة يظهر فيروس جديد لكن إحنا مصممين نعيش

قالت الإعلامية ياسمين عز:«كل فترة يظهر عندنا فيروس، لأن البشرية عايشة أصلا عايزة تنتهي، بس إحنا بنقاوح ومتشبثين بالحياة، وكل شوية ييجي فيروس، بس إحنا متشبثين كويس.. الفيروس الجديد إيبولا وربنا يجعل كلامنا خفيف عليهم هيخلينا هنعمل تسجيل ومتابعة لكل اللي جايين من برة ونعمل فحص ونحطهم 21 يوم تحت الملاحظة وربنا يستر».

وأضافت، خلال حلقة اليوم من برنامج كلام الناس المذاع عبر شاشة إم بي سي مصر: «تعليق صغير لأي حد جاي من المطار منلزقش فيه ما نحضنهوش، ممكن نسلم من بعيد لحد ما نشوف الفيروس رايح فين».
ووجهت نصيحة للسيدات قائلة: «لما تكوني يا شيماء مسافرة بلد عربي شقيق جنبنا وتنزلي يوم الإجازة إنت وسلاحفك الصغيرين تلعبوا في الجنينه أو الحديقة، ويكون فيها مرجيحة، وابنك كريم يقعد على المرجيحة ويلزق وييجي ابن جارتك عايز يلعب يقوله لا أنا حاجزها لأختي جنى ده غلط.. ابنك يلعب شوية على المرجيحة وبعدين شيليه من قفاه عشان ابن الست التانية، ابن البلد عايز يلعب في الحديقة العامة، هي مش بتاعتنا».

وأردفت: «بلاش ابنك وبنتك يقعدوا بالأدوار يمسكوا المرجيحة لحد ما الدنيا تليل.. شيلي عيالك من قفاهم بالتيشيرت اللي عليه ميكي ماوس ده... أنا جالي شكاوي وستات كتير قالوا لي اتكلمي وكله إلا الأمهات».

وواصلت: «بلاش الصوت العالي والدوشة يا شيماء، شاوري لابنك أو هاتي زمارة وزمري له أو حطي البتاعة السلك اللي بتتلبس في الإيد وجريه.. وياريت قبل ما  نمشي من الجنينة ننضف، ما نسيبش الزبالة، نشيل أكياس الشيبسي ونسيب الحديقة جميلة».

وأضافت: «وبعدين فيه إيه حبكت يعني نروح المراجيح برة؟ ما عندنا مراجيح في مصر مالية الدنيا، دانتي لما اتجوزتي منزلتيش الشارع غير لما رحتي تولدي ليه حبكت هنا تخرجي كل جمعة وسبت وإجازة».

وفي سياق آخر، قالت الإعلامية ياسمين عز: «النهارده إجازة، لو أنت قاعد دلوقتي على الكنبة بتتفرج عليَّ، ومفكر إن العمر جرى بيك وملحقتش تتجوز ولا تعمل عيلة، افتكر إن فيه راجل متجوز، في نفس اللحظة، قاعد على الكنبة زيك، ومراته مشغلة المكنسة جنبه، مزيكة حسب الله، وبتلف حواليه، وشوية وهتقعد جنبه تقوله: وريني تليفونك، ومين بعتتلك على الإنستجرام أول امبارح، وتفتش في التليفون، وده وضع أنت متحبش تكون فيه».