النائب إيهاب منصور: العداد الكودي قرار خاطئ و«قطم وسط» لفئة كبيرة

علق النائب إيهاب منصور، عضو مجلس النواب، على العداد الكودي، لافتا إلى أن قرار العدادات الكودية كان قرار ظالم لفئة كبيرة للغاية من المواطنين.

وأضاف، خلال مداخلة هاتفية له في برنامج «كل الكلام» المذاع عبر شاشة الشمس: «القرار ده ظالم للملايين لأنه طلع بدون تفرقة بين الناس.. والقرار أخد في وشه اللي قدم تصالح واللي مقدمش كمان».

وتابع: «هذا القرار به عدة قرارات خاطئة.. الناس اللي مقدمة على التصالح في ناس ورقها ضاع واتقالها قدمي تاني، كان يجب إن القرار يستثني الناس اللي قدمت على التصالح».

وأردف: «إحنا عندنا فوق ال20 مليون مواطن مدرجين تحت بند تكافل وكرامة في الدولة، الناس اللي بتاخد 800 أو 700 علشان يكملوا الشهر عيش بس هل ينفع الزيادة دي عليهم؟.. ده قرار لبعض الناس قطم وسط».

وواصل: «لما يبقى نسبة افقر 30% وعندي منهم تكافل وكرامة وذوي إعاقة.. كل الأرقام دي بتقول في ناس متورة جامد من قصة العدادات الكودية، أنا ضد غن الدولة متاخدش حقها وضد المخالفة لكن من مين وإزاي».

وفي وقت أخر، قال النائب إيهاب منصور عضو مجلس النواب، إن التعديلات بشأن العدادات الكودية والتصالح على مخالفات البناء جاري العمل عليها والأمور تسير بشكل جيد، معلقا: «بالنسبة للعداد الكودي في ناس قدمت، أنا لسه في واحد مكلمني من ساعة مقدم تصالح من 2019 ولحد دلوقتي مخلصش، وجاله قصة العداد الكودي وقالي مش عايزه هبقى أوصل من أي حته وأستغنى عنه، طب ذنبه اي اللي واقف في الطابور بقاله 7 سنين، يعني مخدش تصالح».

لابد من حلول على أرض الواقع

وأضاف، خلال تصريحات تلفزيونية: «حقيقي وزيرة التنمية المحلية حد فاهم وإن شاء الله هيبقى في حلول، لكن الحلول اللي فوق لازم توصل للتنفيذ تحت على أرض الواقع». 

طابور الحكومة 7 سنوات

وتابع: «أنا هقدم طلب إحاطة وسأطالب بكده، الناس اللي بتتعاقب عشان متصالحتش، هتعملوا اي في الناس اللي مقدمين بقالهم 7 سنين، هما واقفين في طابور الحكومة وليس طابور إن هو مش عايز يروح، دا اللي محسوب إنه أخد تصالح».