أمين صندوق نقابة الأطباء البيطريين: التخلص من الكلاب يفتح الباب لحيوانات أخطر

قال الدكتور محمود حمدي أمين صندوق نقابة الأطباء البيطريين، إن ملف الكلاب في الشوارع ليس مجرد ملف رفاهية بل صحة عامة وقضية أمن قومي، معلقا: «الموضوع مرتبط بإن احنا محتاجين نحمي الأطفال والإنسان وفي نفس الوقت نتعامل مع الحيوان برحمة مش معناها عشوائية والخوف مينفعش يخليني قاسي على مخلوق ربنا».

صحة الإنسان مرتبطة بصحة الحيوان

وأضاف، خلال مداخلة هاتفية مع الإعلامي شريف عامر، ببرنامج «يحدث في مصر»، المذاع على قناة «إم بي سي مصر»: «صحة الإنسان مرتبطة بصحة الحيوان والبيئة، في أماكن مفيهاش كلاب بدأ يبقى فيها تعالب وتعابين وأنواع تانية من الحيوانات، بالتالي مينفعش نقضي عن الكلاب تماما، ومش مع زيادة أعداد بشكل يشكل أزمة بل نتبع الوسطية». 

التعامل مع كلاب الشوارع 

وتابع: «لو مفيش وعي في التعامل مع كلاب الشوارع يبقى هتشكل خطر كبير، لكن لو اتعاملنا بوعي ورحمة من غير أذية أو تعذيب مش هتشكل ضرر بالنسبالي، يجب اتباع الأساليب العلمية الحديثة في التعامل مع هذه الظاهرة، يعني الموضوع مش تسميم أو قتل».

القتل والتسميم دون أي فائدة

وواصل: «في بلاد كتيرة جربت القتل والتسميم بدون أي فائدة، وفي دولة بنجلاديش جربت الموضوع مجابش نتيجة، بس جربت التطعيم من خلال تطعيم وتعقيم الكلاب في 56 ولاية من 68 ولاية، وصلت إنها قدرت تقضي على حالات السعار بنسبة 50%».

50 شخص مصاب بالسعار سنويا 

واختتم: «الإحصائيات تشير إلى أن عدد البشر المصابين بالسعار على مستوى العالم 59 ألف بمعدل 160 في اليوم، في مصر الأرقام التقديرية بشكل غير رسمي بتقول  إن 50 شخص في السنة، لكن هذه الأرقام تنقصها الوعي، الناس بتشتكي الفترة دي من العقر اللي بيعض وليس السعار، لكن الرقم دا ما يقارب 50% من الأطفال أقل من 15 سنة لأنهم أكتر ناس بيتعضو وبيتعرضوا لمشاكل مع الكلاب».