محمد الدماطي: الأهلي لا يعرف الفشل.. والضغط الجماهيري سر القوة والنجاح
تحدث محمد الدماطي عضو مجلس إدارة النادي الأهلي،عن عدد من الملفات المتعلقة بالنادي، إلى جانب رسائل دعم للجماهير واللاعبين خلال المرحلة الحالية.
وقال محمد الدماطي : بقالي حوالي شهر و نص قافل الفيسبوك و كل السوشال ميديا تماما ، و امبارح بس فتحت و نزلت صورتي مع الكابتن الخطيب كنوع من الدعم الأدبي لراجل عمل كتير للنادي و بيفضل النادي علي نفسة ، و لة فضل عليا بعد ربنا اني اكون موجود و امثل كيان الاهلي العظيم.
وتابع : فرصة بما ان في حالة هدوء حتي لو مؤقت اقول كلمتين لعل و عسي يحصل نوع من التوضيح ، و كالعادة أنا بتكلم من قلبي و بما يرضي الله و مش بزعل من اي نقد او تجريح لاني عارف ان دي ضريبة المكان اللي أنا في ، و لاني متاكد ان النادي الاهلي هو مصدر السعادة يمكن الوحيدة ل٨٠ مليون بني ادم فطبيعي يحصل زعل ، زي لما في اي نجاح بيحصل اشادة ، و دايما بقول مش بعرف مهما حاولت استخبي وقت التراجع طالما بظهر وقت النجاح
وواصل : مفيش حد أبدا سعيد بالنتائج و دة كان واضح جدا في بيان النادي ان في عملية إصلاحات كبيرة حتتنفذ الفترة الجاية ، و طبيعي في اي منظومة في العالم ، نادي او شركة او اي مكان في ضغوطات مستمرة ان يحصل اخطاء نتيجة الضغط دة ، الانسان بطبيعتة طول ما هو مضغوط ممكن يغلط ، الشطارة ان الاخطاء تبقي قليلة و يتم تداركها سريعا ، و اعتقد ان حجم البطولات و الإنجازات في ال٨ سنوات اكبر بكتير من حجم الإخفاقات و لكن دة حالنا كنادي اهلي مش بنقبل الإخفاق و دة سبب النجاح المستمر لكن ممكن يبقي سبب احيانا في اخطاء
وأكد : الضغط المستمر اللي بيولد اخطاء مش بس علي الادارة ، ممكن كمان يكون علي المدربين و اللاعبين ، ممكن الاختيار فنيا يكون سليم لكن قدرة المدرب او اللاعب علي استيعاب حجم المتطلبات و الضغوطات يبقي ضعيف و دة بيحصل و طبيعي و شوفناة مع لاعبين كتير سواء لم ينجحو او قدرتهم علي العطاء في اعلي مستوي مكنش فيها استمرارية طويلة ، و ممكن يخسرنا مدربين و لاعبين ممتازين بسبب حرصنا المستمر على عدم الإخفاق او اعطاء فرص .
وأشار إلى : النادي الاهلي بيستمد قوتة من جمهورة ، محتاجين الجمهور يبقي كلة علي قلب راجل واحد و هنا مش قصدي الادارة ، قصدي النادي ، مش عايزين خناقات و تنمر علي لاعيبة ، مش عايزين خناقات فنية علي لاعبين عشان انتصار لوجهة نظر و حب و كرة ، اللي بيلعب راجل احنا كلنا في ضهرة .
وواصل : عايزين نبص علي الكورة ككورة و كلنا نبقي وحدة واحدة ، عندنا مشكلة في المدرج و اتكلمت عليها و كمية الرسايل و الشتيمة اللي جتلي مش طبيعية ، بس اكدتلي حاجة واحدة ان دة ملف مهم جدا و حساس جدا ، و والله ما حد مقصر ، في بس في رواسب و مشاكل محتاجة وقت و ثقة من الجميع ، مش مهم مين يبقي موجود ، مش مهم المسمي ، كلنا جمهور الاهلي ، من ايام ما كانت التالتة دي هي التانية دلوقتي ، من ايام عم حسين ربنا يرحمة ، لا كنا بنقول مين بيقودنا ، ولا كان في دماغنا حاجة غير التشجيع و كنا بنتضرب من الامن المركزي بالخرزانات كل ماتش و بتعدي ، بس للأسف كلة نسي الايام دي .
وأتم : الاهلي كبير و كبير اوي و طالما اختارنا كلنا ان طموحنا يبقي ملوش حدود يبقي لازم نفهم ان ممكن دة يسبب اخطاء و تاني مش بتكلم عن ادارة بس ، بتكلم علي لاعيبة و مدربين ، و علي الجمهور كمان ، لان طموحنا الكبير دة خلانا مش بنعرف نفرح عشان دايما باصين لفوق اكتر . أنا في الاخر جمهور و طالع من المدرج و ربنا يعلم أنا بحب الاهلي اد اية ، و شايف ان كلنا لازم علي اد ما نضغط ، يبقي دايما ضغطنا ايجابي و يبقي دايما عامل نجاح .
واختتم قائلًا : حنرجع ؟ اكيد حنرجع ان شاء الله، النادي الاهلي منظومة مش بتعرف الفشل ، حصل تراجع ؟ اكيد حصل و بيحصل و التاريخ بيقول كدة و بالعكس علي اد ما ضغط الجمهور صعب بس لما الضغط زاد في السنين الاخيرة ، العودة بتبقي اسرع و بكتير ، شوفنا زمان فترات تراجع اطول و اوحش لما الضغط كان اقل ، اسم الاهلي زي الجبل ما يهزة ريح طول ما الكل حاطط اسم الاهلي قدامة
