تامر أمين: الناس لازم تكون واعية ومحدش يمشي وراء الهوجة والخرافات

علق الإعلامي تامر أمين على الجدل المثار بشأن «نظام الطيبات»، مؤكدا رفضه لحالة الهوجة وانسياق الناس وراء هذه الخرافات، مشددا على أهمية العودة إلى الأساسيات في التغذية الصحية.

متزعلوش مني

وقال تامر أمين عبر برنامجه آخر النهار: «ما تزعلوش مني، أنا عارف إن كلامي ساعات بيوجع وساعات بيزعل، بس والله يمكن السنين الطويلة أثبتت إنه حتى لو كلامي بيزعل شوية بس هو في الصالح ومفيد».

وأضاف: «أنا بصراحة مستغرب جدا من الهوجة اللي كتير من الناس عاملينها حوالين موضوع نظام الطيبات، وأنا هنا مش بتكلم عن شخص الدكتور ضياء العوضي رحمه الله عليه، لأنه الآن بين يدي الرحمن وفي عالم آخر، فبالتالي خارج دائرة المساءلة أو النقد».

وتابع: «القصة دلوقتي في المضمون نفسه، مستغرب منكم بجد، الناس كلها بقت واخدة الموضوع بحساسية وهوس، هو نظام الطيبات ده موجود ولا لأ؟ صحي ولا لأ؟ ناكل إيه وما ناكلش إيه؟».

وأشار إلى أن المشكلة الأساسية في العادات اليومية قائلا: «إحنا تقريبا كل عاداتنا وسلوكياتنا الغذائية غلط، بنعمل كل حاجة غلط، ونسيب الأصل ونمسك في التفاصيل».

وأضاف: «بدل ما تركز في الأساس اللي هو بتاكل إيه كل يوم وبتحافظ على جسمك إزاي، تقعد تسأل عن الدقيق الأبيض ونظام الطيبات، طب ما تبدأ بالأصل الأول».

70 أو 80% من أكلنا بقى ديليفري أو من بره

وتابع: «إحنا دلوقتي 70 أو 80% من أكلنا بقى ديليفري أو من بره، ونسينا أكل البيت النضيف اللي معمول قدامك بإيدين أمك أو أختك، اللي أنت ضامن نظافته».

وأوضح: «دلوقتي كله بيستسهل وبيأكل يا إما أكل شارع أو تيك أواي أو جانك فود، واسمها جانك يعني حاجة سيئة، برجر، بيتزا، مقليات، مفسخات، أكل بايظ، وللأسف معظم ولادنا عايشين على الأكل ده، والأكل سابق التجهيز والعلب اللي بتتسخن».

وتساءل: «مين فينا بيحافظ على صحته؟ مين بيمشي؟ مين بيكشف ويعرف عنده إيه؟ مفيش، لكن أول ما تطلع هوجة نمشي وراها».

وأكد: «أنا ما بحبش فكرة الهوجة والموضة، وإحنا أساسا مش عاملين الواجب اللي علينا وهو الأساس في الأمور، عشان كده بحاول أفكر نفسي وأفكركم بإيه الواجب علينا، وإيه الأساس اللي لازم نمشي عليه، ولو عملنا كده مش هنحتاج لا نظام طيبات ولا غيره».