محامي ضياء العوضي لياسمين عز: تم استخراج الجثة وتشريحها ودفنها وننتظر النتيجة

قالت الإعلامية ياسمين عز: «كلام الناس الأيام إللي فاتت عن وفاة الدكتور العوضي والإدعاءات إن وفاته غامضة وملابسات الوفاة والجديد في الموضوع إن الأستاذ مصطفى مجدي محامي الدكتور العوضي قال في بيان إنه طلب إعاده تشريح الجثمان مرة ثانية بهدف الوصول للحقيقه ومعرفة سبب الوفاة بشكل دقيق».

وأضافت، خلال حلقة اليوم من برنامج كلام الناس المذاع عبر شاشة أم بي سي مصر: « وأسرة الدكتور العوضي قالت إن فترة الوفاة هم حاسين بغموض كبير فيها، وقبل إكتشاف الوفاة وكل الناس بتتكلم عن الموضوع ده».

وفي هذا الصدد، قال الأستاذ مصطفى مجدي محامي الدكتور الراحل ضياء العوضي، خلال مداخلة هاتفية في البرنامج: «طالبنا بإعاده تشريح الجثة عشان كان في بعض الشكوك والغموض حول الوفاة، وكان في فترة اختفاء قبل الوفاة غير مبررة عندنا، وزوجة المرحوم حررت توكيل وعلى أساسه قدمت الطلب، وبالتالي طلبنا ده وطلبنا صورة من التحقيقات الكاملة وتفريغ الكاميرات وتشريح الجثة، وصدر قرار من نائب العام بالموافقة وإستخرجنا الجثة النهاردة وتم التشريح وتم الدفن مرة أخرى لكن حاليا في انتظار النتيجة».

وتابع: «إحنا لسه منقدرش نتكلم عن أي حاجه دلوقتي حول ملابسات الوفاة والمعلن هو جلطة في القلب أدت للوفاة ولكن بإذن الله تطلع النتيجة ونوصل للحقيقة وبعد ما تطلع النتيجة هنعلن الطب الشرعي وصل لإيه»..

واختتم حديثه قائلا: «أنا مؤمن ومواحد بالله أنا وكل اللي بيشكك في الموضوع، لكن في فترة غموض من يوم 12 ليوم 19 انقطعت كل سبل الاتصال ما بيننا وما بينه وبعدين طلع بيان قالوا إن هو متوفي من يوم 14، وده أثار شكوك لينا ولو هو فعلا مات في الفندق ليه الفندق مبلغش، ولو مات يوم 14 ليه محدش قال ولا السلطات بلغت، هو من يوم 12 ل 14 كان فين، لو إحنا عندنا إجابات أكيد مش هنعمل كده، ولو جه إجابات الموضوع هيكون أتقفل تماما بالنسبالنا ونتمنى من الله تكون الوفاة الطبيعية».

وفي وقت سابق، أشارمحامي الدكتور الراحل ضياء العوضي، إلى أنه تم تنفيذ القرار وفق الضوابط القانونية، حيث جرى استخراج الجثمان وإجراء الصفة التشريحية بواسطة الطبيب الشرعي المختص، قبل إعادة دفنه مرة أخرى بعد الانتهاء من الفحص.

وأكد البيان أن هذه الإجراءات تأتي في إطار السعي لكشف ملابسات الوفاة والوصول إلى الحقيقة كاملة، مع الإعراب عن الثقة في مؤسسات الدولة والنيابة العامة لإعلاء كلمة الحق وتحقيق العدالة.