ياسمين عز: زيزو مظبوط على الشعرة عارف إمتى يسرح الشعره
قالت الإعلامية ياسمين عز: «حلمت خير اللهم اجعله خير الأهلي كان لابس أحمر في أحمر وراكب حصان أحمر في أحمر ماشي وسط زرع أخضر في أخضر ولقى قدامه شجره أبيض في أبيض أغصانها بيضاء تجنن نازل منها غصنين على كل غصن نازل منه بطيخة، راح خطفهم وجاري، إن صدقت رؤياي يبقى الأهلي هيكسب 2-0».
وأضافت: خلال حلقة اليوم من برنامج «كلام الناس» المذاع عبر شاشة ام بي سي مصر: «لاعيبة الأهلي يا جماعة إيه الحلاوة دي والشطارة دي والأداء العالمي اللي مشفتش قبله ولا بعده ولا هنشوف ده ولا في cr7 وأصحابه.. وإمام عاشور كان مموت نفسه وقلبه على الفرقه ياي من كتر الحماس كان هيطقله عرق بعد الشر عليه وعلى اللي حواليه ولا كان بيتدلع ولا أي حاجه أنا اللي بتدلع، ولا زيزو مين يقدر يتكلم على زيزو ده ظابط نفسه على الشعره يعرف أمتى يشوط الكوره وأمتى يسرح الشعره، في الدقيقة 30 يشوط الكورة والدقيقة 31 يسرح الشعره 32 يعدل التيشرت ده الواجهه بتاعتنا، ومصطفى شوبير واقع وكله ملموم ووسط كل الأجواء دي زيزو بيعدل شعره يمين وشمال عشان يخفف من حدة الموقف مش كل حاجه تاخدها بالسلبي لازم نخطف الكاميرا عشان منتفضحش قدام الناس»
وتبعت: «محدش يتكلم عن محمد شريف المخيف الحريف ولو جابوا له 10 أسامه أبو علي ولا يهزه والكلام ده على مسؤوليتي، وأنتم عارفين ـنا في الكورة مبهزرش، هما قالوا الأهلي فوق الجميع وهنظل أوفياء لكن متضغطش علي أكتر من كده.. هنكسب بكره إن شاء الله سامحني يارب أنا كذبت كثير في البرنامج ده لكن معلش بكره الجمعة في ماتش وبعده السبت في برنامج نكسب يوم الجمعه نطلع يوم السبت نسقف في البرنامج أي حاجه ثانيه يوم الجمعه عندنا كلام ثاني في البرنامج».
وأردفت: «واخدين بالكوا إن أنا لابسه أسود النهارده.. بطلت البس احمر علشان خايفه يقولوا فال وحش ووشها وحش، مع إن انا وشي حلو على الجميع وياما الأهلي كسب بسببي لكن النهارده أنا حزينة لكن همثل إن أنا سعيدة عشان عندي ضيوف جايين بعد شويه.. أرجوكم محتاجه حد يساعدني محتاجه أنبسط بكره نكسب محتاجه أنام أحلم ببكره ويجي بكره وأنبسط وأقعد قلبي مفرفح من الانبساط ومقعدش متزرزعة وانا بنتفرج على الماتش طمنوا قلبي».
