شيماء سعيد تكشف كواليس الساعات الأخيرة في حياة إسماعيل الليثي: "كان بيرجع دم"
خرجت الميكاب أرتيست شيماء سعيد لتتحدث عن كواليس الساعات الأخيرة في حياة زوجها مطرب المهرجانات الراحل إسماعيل الليثي، وذلك من خلال مقطع فيديو عبر حسابها على منصة تيك توك.
وأوضحت شيماء سعيد قائلة: “بعد ما عملي عيد ميلادي روحنا قالي أنا برجع دم وضهري وجعني قولتله يا أبو رضا ما يمكن من السجاير، وبعدين نام بعرض السرير وخدني في حضنه من 10 الصبح لحد 7 بليل، وصحي يشوف هيلبس ايه، فأنا قولته طب خد اليومين دول أجازة وأنا هديك فلوس الأوردر، قالي لا ده أوردر تبع ناس تقيلة في البلد وهيعملولي حوار ولازم أنزل”.
زوجة إسماعيل الليثي تحلف بأنها لا تريد مجوهرات
واستكملت شيماء سعيد قائلة: “وقتها أنا كلمته قولتله أن الكوليه اللي جابهولي هدية مش ذوقي وعايزة ارجعه، عشان كنت عارفة أنه بيمر بضائقة مالية، وسعود صاحبه لو ضميره لسه صاحي يطلع يكدبني، المهم روحت شارع المحكمة في إمبابة وطلبت ارجع الكوليه الراجل موافقش قولتله أن أبو رضا فاضله 60 ألف على تمن الكوليه وياخد الكوليه ويديني ال100 ألف اللي ادفعوا، مرضيش فكلمتله أبو رضا ولما سمعه خاف ورجعلي ال100 ألف، ده يوم الحادثة، وأنا قولتله أن الفلوس دي هنحط القرش على القرش ونعمل حاجة لنفسنا، قالي لا دي فلوسك وأنا ربنا يكرم وهجيبلك الأحسن منه، قولتله والمصحف ما هجيب”.
تفاصيل حادث إسماعيل الليثي
وأوضحت شيماء سعيد تفاصيل الحادث المأسوي قائلة: “كلمته أشوفه هيأكل ايه وقدامه قد ايه ويجي، قالي أن الطريق من المنيا للبيت ساعتين، أتاريه كان عنده شغل تاني وخاف يقولي أزعل وأحنا لسه متصالحناش، والسواق ربنا يديله الصحة فدى نفسه وخلي الحادثة كلها تيجي في وش إسماعيل، أنا كنت فاكرة هيقولولي كسور في رجله وفي إيده، لاقيت ترك أخوه بيكلمني ويقولي إسماعيل عمل حادثة قولتله متحورش ده قافل من 5 دقايق معايا، قالي واللهي عمل حادثة على طريق المنيا، رضا مات بنفس خبطة إسماعيل في دماغه من ورا مفتوحة وبؤبؤ المخ طالع، نفس الكلام إسماعيل بس على أكتر، كل ما افتكر منظره اضرب نفسي بالشبشب واقول يارتني ما زعلت منه أبدًا حتى لو كان بيضربني”.
