خبيرة تنتقد مقترح تعديل سن الحضانة: هل منطقي ينتزع الطفل من حضن أمه في صغره؟!
كشفت الدكتورة لمياء بسيوني، مؤسس حملة أمهات تصنع المستحيل، عن بنود مقترح تعديل قانون الأسرة، معلقة على فكرة قانون تعديل سن الحضانة لـ 7 أو 9 سنوات، قائلة: «هو منطقي في عز ما الطفل يكون محتاج أمه ينتزع من حضن أمه».
الأب هيحفظ الطفل في وقت الامتحان ولا هيلبس ولا هيهتم؟
وأوضحت خلال مداخلة هاتفية مع الإعلامية نهلة عامر، ببرنامج «حديث اليوم»، المذاع على قناة الحدث اليوم: «هو الأب هيحفظ الطفل في وقت الامتحان ولا هيلبس ولا هيهتم ولا هيعمل إيه؟».
هل جدة الطفل أو عمته أو زوجة والدة أحن من الأم؟
وأضافت: «في الحالة دي الأب هيسيب الطفل للست اللي في حياته سواء أمه أو زوجته أو عمته، والسؤال هنا: هل الناس دي هيكونوا أحن عليه من أمه؟ يعني إزاي الطفل يتعذب مع زوجة أب والأم عايشة؟!».
أمهات تمتنع عن الزواج لتحتفظ بحضانة الأولاد
وتابعت: «في أمهات كتير بتمتنع عن الجواز علشان ابنها يفضل في حضنها، ولو الأب بيعمل واجباته كلها بالرغم من الطلاق الست مستحيل تبعد أولادها عنه، الأم مش غاوية تشيل الهم يعني أكيد».
وواصلت: «وطبعا الأب اللي بيعمل حقوقه كلها بعد الطلاق قليل جدا جدا، ده بيكون مدخل أولاده مدارس أمريكية وبعد الطلاق بيفتقر، معرفش إزاي يعني، الأم فاهمة إن الأب ده مش أمين، علشان كده اختارت الطلاق علشان تنقذ نفسها وتنقذ أولادها منه، أكيد هي يعني مش بتحب التعب والشقى».
وفي سياق متصل، أكدت لمياء سيوني مؤسس حملة أمهات تصنع المستحيل، رفضها "الاستضافة" في قانون الأحوال الشخصية، إلا إذا كان في مكان عام.
وأوضحت خلال مداخلة هاتفية مع الإعلامية نهلة عامر، ببرنامج «حديث اليوم»، المذاع على قناة الحدث اليوم:«كل سيدة بتكون على علم هل زوجها ده أمين على الأولاد، أو زوجة الأب أمينة على الأولاد ولا لأ».
وأشارت إلى وجود حالات خطف كثيرة من قبل الأزواج، مضيفة: «ومفيش ضوابط تقدر تمنع ده لأن الزوج بيكون عايز يلوي دراع الأم علشان تتنازل عن القايمة أو النفقة، ومهما كان فيه عقوبات مش بيهتم».
