بائعة خضار تتحدى الألم: «بتسند على دراعي وربنا مش هيسيبني»

تحدثت بائعة الخضار «أم حسن» عن رحلة كفاحها في الشارع من الساعة 6 صباحا وحتى 12 مساء، قائلة: «ببيع خضرة من 6 سنين، وممكن أروح بـ 150 جنيه في اليوم، في أيام عادي مش ببيع فيها وبرمي الخضرة على الرصيف بس المهم أقعد، لإني بحس إني مبسوطة وأنا قاعدة على فرشتي بدل ما أروح أشتغل مع حد يضايقني». 

كفاح رغم الألم 

وأضافت، خلال لقائها مع الإعلامية سارة مكي ببرنامج «ملكة التريندات»، المذاع عبر «نيوز رووم»، أنها لم تنزعج من جلوسها وعملها في الشارع، معلقة: «أنا مش بتكل على حد وبتسند على دراعي، جاهدوا وربنا هيقف معاكم، أنا رجلي وارمة من تحت بس حابة إني أشقى عشان ربنا يكرمني، وربنا مش هيسيبني، توكلوا على ربنا أحسن من الدنيا كلها».

جهاد في سبيل الله

وتابعت: «نفسي أكون من المقربين لربنا، ونفسي أجوز بناتي وأسترهم وأفرح بابني وأقضي رسالتي، عايزة أحس إني عملت إنجاز في الأرض».

وواصلت بائعة الخضار: «عندي 5 أبناء، جوزت 2 وباقي 3، وبساعد في مصاريف البيت، بخرج من الساعة 7 الصبح وبروح 12 بالليل، بواجه صعوبات كتير في الشارع بس بعديها لأن اللي عايز يقف هيستحمل».

أم حسن: عايزة أكل لقمة عيش

وأكدت أنها حاصلة على شهادة محو الأمية فقط، لكن رغم المأساة والمرازية في الشارع إلا أنها تواجه ذلك، مشيرة: «اللي يقولي شوفيلك مكان تاني انتي قاعدة قدام محل، عايزة أكل لقمة عيش يا جماعة حسوا بيا وحنوا عليا، عايزاهم بس يفهموا إن الست دي بتاكل لقمة عيش وقاعدة في الأرض مش مرتفعة ممكن محدش يشوفني، أو حد معدي بالعربية يشوفني يشتري مني».

كلمة مؤثرة للشباب العاطلين

وأكملت: «في ناس بتقولي معلش حقك عليا وفي ناس ترخم بس بعديها وبستحمل عشان اللي عايز يعيش ويجاهد عشان بيته وولاده هيوصل».

واختتمت بتوجيه كلمة مؤثرة للشباب العاطلين عن العمل بحجة عدم وجود فرصة: «ربنا بيحب الإنسان المجاهد ويفضله درجة، عايزاكم تقربوا من ربنا وجاهدوا معاه ومتقولوش الحياة صعبة لا جاهدوا ولازم نقسى على نفسنا عشان منمدش إيدينا لحد».