محمد الباز: إبراهيم عيسى مش سيناريست ولا بتاع دراما

تحدث الكاتب الصحفي محمد الباز، عن رأيه في إبراهيم عيسى السيناريست، قائلا إن إبرهيم عيسى فاشل بامتياز كسناريست، معلقا: «هو فاهم إن السينما هتوصل أفكاره أكتر من إنه يكتب مقال في جورنال أو موقع وهو محق في ذلك، بس خلي بقى الأسطات بتاعة الشغلانة يعملوها متعملهاش بنفسك، هو مش رجل بتاع دراما». 

فيلم الملحد فشل لأنه تقليدي

وأضاف الباز، خلال حواره مع الإعلامي تامر عبد المنعم، ببرنامج «البصمة»، المذاع على قناة «الشمس»: «فيلم الملحد فشل لأنه تقليدي وعالج قضية ملحد تقليدي، لأن حاليا في ملحدين تقليديين وملحدين نتاج السوشيال ميديا وجيل زد وألفا، يعني أنا معتقدش إن إبراهيم عيسى يعرف الوقت الحالي، دا موضة قديمة».      

خطورة الإلحاد الجديد 

وتابع: «الناس ضحكت لما أسامة الأزهري قال أنا قابلت طفل عنده 10 سنين ملحد وضحكوا واتريقوا، وفي ولاد عندهم 10 سنين و12 سنة ملحدين».  

وواصل: «خطورة الإلحاد الجديد أن الولاد مش فارق معاهم يناقشوا ربنا موجود والا مش موجود، دا هو بيقولك إن ربنا موجود بس أنا مش عاجبني أدائه، ودا أخطر وموضوع مسكوت عنه». 

ودعا الكاتب الصحفي محمد الباز، إلى تشكيل هيئة لمكافحة الجهل العام في مصر، معلقا: «يعني الناس اللي بيحكموا على وزير التعليم ميعرفوش اي اللي حصل، والنائبة اللي طلعت قالت التبرع بالأنسجة في ناس طلعت قالت دا جهل عام، لأنهم مش هياخدوا جلدها دا هياخدوا أنسجة لأن الناس معتقدة أنهم هيسلخوا الجلد».   

مكافحة الجهل العام

وأضاف الباز، خلال حواره مع الإعلامي تامر عبد المنعم، ببرنامج «البصمة»، المذاع على قناة «الشمس»: «بالنسبة للتعديل الوزاري والتعليق إن دا ييجي ودا يكمل ودا يمشي، دا مش دورك يا حبيبي، وأنا شايف إن الأداء والحقيقة ضد الدولة المصرية، أصلها مش سويقة، عشان كده بقولك مكافحة الجهل العام».

وتحدث الكاتب الصحفي محمد الباز، عن كواليس وتوقعات التعديل الوزاري الجديد، قائلا إنه تم إدارة مسألة التشكيل الوزاري في مكتب الرئيس بأعلى درجات الاحترافية من التكتم على الأسماء.  

تشكيل وزاري جديد

وأضاف الباز، خلال حواره مع الإعلامي تامر عبد المنعم، ببرنامج «البصمة»، المذاع على قناة «الشمس»، أن الرئاسة مسؤولة عن التشكيل الوزاري الجديد، لكن المواقع تجتهد في التوقعات.