ياسمين عز: الأهلي مش بيضغط عليه يا إمام.. وهنقعد جنب الحيطة ونسمع «الزيطة»
علقت الإعلامية ياسمين عز عن خبر غياب نجم الأهلي إمام عاشور عن بعثة الأهلي لتنزانيا، وقالت: «جمهور الأهلي صحي على خبر هروب أمام عاشور من بعثه الأهلي، والمدرب قرر استبعاده من قائمة المبارة وبيكلموه موبايل مقفول، الحقيقية عندنا أسئلة كتير، هل ظبط المنبه ومضربش؟.. هل موبايله اتسرق مثلا؟ أصل دي بعثه مش شله صحاب طالعه الساحل يعني علشان تقفل الموبايل ومتروحش يا إمام، ده انت اخر عنقود الموهوبين يعني، دوروا معانا على إمام، بدأنا نقلق ونتوغوش لازم نعرف هو فين ونتطمن عايزين أي رد».
وأضافت عز خلال حلقة اليوم من برنامج «كلام الناس» المذاع عبر شاشة ام بي سي مصر: «نتمنى سبب الغياب يكون منطقي لأن الأهلي حط غرمة مليون ونصف وإيقاف أسبوعين وهيأدي تدريباته منفرد وهنقعد جنب الحيطه ونسمع الزيطة».
الأيد مش بتتشل في دور البرد
وأردفت ياسمين عز: «في كلام بيقول أنه أصيب بالمتحور الجديد، بس أنا عندي تفسير لو حد عنده متحور وبيموت يياريت يتصل يبلغ الاهلي أنه بيموت وعنده برد وصوته مش طالع على الأقل يكتب، بس الايد بتكتب يعني مش بتتشل في أدوار البرد».
هل يريد ترك الأهلي؟
واستكملت ياسمين عز:«في حركه إنقلات جديدة يوم ٣١ يناير، وقلبي يحدثني أن في حاجه، هل جاله عرض وبيفكر يسيب الأهلي، الحركه قوية أن حد عنده تدريب مع الاهلي ويطنش، بس عموما أخر يناير هتقولوا ياسمين عز قالت، كل مره بقولكم توقع كروي بتحصل والواقعة دي علامة إستفهام كبيرة ومفيش أي تبليغ، لكن هنعرف بعدين يا ولاد بس قلبي مش مطمني والفار بيلعب في عبي ان في حاجه».
واختتمت ياسمين عز حديثها بتوجيه رسالة لإمام عاشور قائلة: «الأهلي مش بيتضغط عليه يا إمام، الأهلي استحملك كتير ودي مش تصرفات لعيبة محترفة».
وفي السياق ذاته، قد وصل الفريق الأول لكرة القدم بالنادي الأهلي، إلى تنزانيا اليوم استعدادًا لمواجهة يانج أفريكانز التنزاني، وتأتي تلك المباراة ضمن مباريات الجولة الرابعة من دور المجموعات لبطولة دوري أبطال أفريقيا، ويتصدر الأهلي المجموعة بسبع نقاط بعد الفوز في مباراتين والتعادل في مباراة، فيما يأتي يانج أفريكانز التنزاني في المركز الثاني بأربع نقاط.
