ياسمين عز توجه رسالة للفتيات: متطلبيش دهب كتير.. استفادي بعريسك واتجوزي بسرعة
قالت الإعلامية ياسمين عز: «متطلبيش يا شيماء الدهب بالجرام ولا تقولي لا عايزة دبلة أو خاتم صب، خدي حاجه شكلها حلو وخلاص».
وتابعت خلال حلقة اليوم من برنامجكلام الناس المذاع عبر شاشة إم بي سي مصر: «استفادي بعريسك يا شيماء ومتطلبيش كتير وخلصي بسرعة واتجوزي».
رفقا بالراجل
وأردفت: «رفقا بالرجل، هو لو سابها مش هياخد الدهب، مش هيرجعله تاني، ولو طلق مش هياخد الدهب».
وفي سياق متصل، قالت الإعلامية ياسمين عز، خلال تقديم برنامجها «كلام الناس»، المذاع على شاشة قناة «إم بس سي مصر»: «لو خلاص دخلتي خطيبك ونزلتيه من على كتفك جوه باب الشقة تحفة، خطيبك جالكم البيت يشتغل بلقمته بقى، والا هتتحسب عليه خطوبة والسلام؟، لا بعد ما تتخطبي خطيبك هيزوركم مرة في الأسبوع هي مرة كفاية مش مرتين ولا تلاتة».
خطيبك يعمل بلقمته
وأضافت:« خطيبك طول القعدة يفضل ياكل ويشرب ويمرح ويحلي ويحدق يقزقز ويمزمز ويتفرج على الماتش، لا خطيبك لازم يشتغل بلقمته وتستفيدي منه، خليه يصلح السخان والشفاط ويغير فيشة الدفاية ويغيرلكم اللمبة المحروقة لو بيفهم في السباكة خليه يصلح الحنية اللي بتنقط والحوض اللي بيسقط».
كما وجهت الإعلامية ياسمين عز انتقادات للزوجات اللاتي يطلن البقاء في منزل أهاليهن، معتبرة أن هذا التصرف يؤثر على راحة الوالدين ويسبب إزعاجا للأشقاء بسبب تصرفات الأطفال.
كلي واتكلي على الله
وبدأت عز حديثها بمطالبة الزوجة بأن تكون خفيفة في زياراتها، قائلة: «إنتي بتبقي قاعدة عند أهلك ليه؟ ما تتغدي وروحي.. اتعزمي، كلي وتنبسطي وتمشي، بلاش فكرة إنك تاخدي عيالك السلاحف وتباتي بالأسبوع، كفاية كده».
وانتقدت ياسمين عز تدخل الزوجات في شؤون أشقائهن الصغار ومحاولة فرض أطفالهن عليهم، معلقة: «طول ما انتي قاعدة بتأمري وتتأمري.. اغسلي لابني، سخني لبن لابني.. وخالتو أصلا زهقانة من الدنيا وعايزة تطفش، تروحي انتي قارفة خالتو بطلباتك؟».
وتابعت: «تزعلي وتتقمصي لو أخوكي اشتكى إن ابنك المقروض كسر البلاي ستيشن، أو أختك زعقت لبنتك عشان بتلعب في مكياجها اللي جايباه بجمعية؟ واجهي نفسك.. محدش طايقك ولا طايق عيالك».
جوزوكي عشان يرتاحوا منك
وأكملت ياسمين عز: «أهلك جوزوكي يا حبيبتي عشان يرتاحوا منك أصلا، مش عشان تجيبي لهم نسخ كتير أصغر حجما منك.. ولادك بيقلبوا البيت مرستان وبيوسخوا الأرضية، والست كبرت ومش قادرة.. سيبي أهلك يعيشوا في سلام، النسخ دي لازم تنقرض».
