"علشان كلنا بنغلط".. هيدي كرم توجه نصائح بشأن القرارات الخاطئة في حياتنا
نشرت الفنانة هيدي كرم فيديو لها علي الحساب الرسمي عبر موقع تداول الصور والفيديوهات إنستجرام توجه فيه نصائح بشأن القرارات الغلط معبرة عنه ببعض الكلمات "عشان كلنا بنغلط" .
هيدي كرم توجه نصيحة لجمهورها
قالت هيدي كرم : “السلام عليكم .. النهاردة جاية اكلمكوا عن حاجة مبناخدش بالنا منها خالص واحنا بنعملها ، وبتكلفنا وقت كبير ووجع كتير وخسائر كبيرة اوي ، ألا وهي ، كلنا بنغلط وكلنا بناخد قرارات غلط ، زي مثلا قرار أنا عايزة اهاجر بلد تانية ، أنا عندي حلم الهجرة لبرة ، بلد متقدمة ، بتدي سكن للناس ، بتدي فلوس للناس ، بتعلم الناس ببلاش ، أنا عندي حلم إن أنا اعيش في هذه الدولة ، حلم أمريكا ، حلم كندا ، حلم أستراليا ، فأنا باخد بعضي وباخد عيلتي وباخد ولادي وباخد مراتي وبطلع أهاجر ، وبكتشف في النص إن دا قرار غلط ، إني مش عايز أقعد هنا ، عايز أرجع بلدي ، إن أنا هستحمل بلدي بس المهم إني عايز أرجع أعيش فيها ، لكن أنا بكابر ، أكابر إن أنا أخد قرار غلط إن أنا عايز اسيب شغلي وأروح شغل تاني ، وبعد كدا أكتشف إني مش عايز الشغل دا خالص ومش لاقي نفسي فيه لا أنا كنت مبسوط في شغلي القديم بس لأ أنا مش هعمل كدا ومش هقول كدا عشان مبانش غلطان ، أخش علاقة تطلع غلط مش مناسبة ليا ومش بتاعتي بس لا أنا هفضل في العلاقة دي ، انا مش هفرح الناس فيا ، أنا هكمل في العلاقة دي وهعافر فيها عشان بس بعد كدا محدش يقولي إني غلطان قدام الناس والناس تشمت فيا ، دا أكبر غلط .”
هيدي كرم تتذكر مدرس التاريخ
إستكملت هيدي حديثها قائلة : "مدرس التاريخ بتاعي مستر جورج الله يمسيه بالخير قالي أي " مش غلط إنك تغلط ، الغلط وكل الغلط إنك تكمل في الغلط وتكابر في الغلط " ، لما ناخد قرار غلط في حياتنا ، كلنا بناخد قرارات غلط ، علي فكرة القرار الغلط دا دا نعمة كبيرة أوي لأنه بيعلمك حاجات كتير أوي عن نفسك وعن اللي انت عايزه واللي مش عايزه ، فبالتالي اوعي تفكر متغلطش لأنك لو محاولتش متغلطش مش هتعيش ببساطة ، مش هتعيش ومش هتعرف تاخد قرارات لأنك خايف تغلط ، ومش هتسافر لأنك خايف تغلط ، ومش هتقدر تخش في علاقة لأنك خايف تغلط ، ومش هتغير شغلك لانك خايف تغلط ، لأ لازم تاخد قرارات وتتحمل أحتمالية إنها تكون سليمة أو قرارات خاطئة لأن القرار الغلط هو دا اللي بنتعلم منه ، فبالتالي مش عيب إنك تغلط العيب إنك تكمل وتكابر في الغلط ، عشان لو الـ " أنا “ بتاعتك الداخلية تقولك لأ أحنا مبنغلطش ، أحنا مش هنمشي في العلاقة دي ، أحنا مش هنسيب الشغل دا ، ومش هنرجع من البلد دي عشان الناس متشمتش فينا.”
واختتمت هيدي كرم: “طب أنت أستفدت أي يا جميل أنت وأنت مكمل في شغل أو علاقة أو مكان أو بلد أنت مش مرتاح فيه ، أنت مش حاسس نفسك فيه ، أستفدت أي ؟ وقت من عمرك بيضيع ، فرص بتضيع ، سعادتك بتضيع ، كله بيضيع وأنت الوحيد اللي خسران ، لأ لما أخد قرار غلط أقف قدام نفسي وأقول أنا خدت قرارغلط وأعترف بغلطي لنفسي وللأخرين لأن الأعتراف بالغلط قوة كبيرة جدًا ، و أرجع خمس خطوات لورا وأراجع هذا القرار وأتراجع عنه وأقفل الباب دا ، ومندمش لأن الندم إنتشار كبير عند البني أدم بيخليه واقف محله مبيتحركش ، متندمش بالعكس أقف كدا مع نفسك وقول أوكيه أنا غلط لي وفي اي وإزاي غلط وإزاي مغلطش المرة الجاية ، وأبدأ من جديد لأن القرار الغلط هيعلمني لنفسي حاجات كتير ، وعن اللي أنا عايز أشوف حياتي في حاجات كتير أوي ، وهطلع من القرار الغلط بعد ما أتراجع عنه أقوي و أشجع ، أوعوا تخافوا إنكوا ترجعوا في قراراتكوا الغلط ، بل خافوا إنكوا تكملوا فيها من باب إنكوا مش عايزين شكلكوا يبقي وحش ، اللي بيحبك بجد ومن قلبه هيفرحلك ، واللي مبيحبكش كدا كدا هيشمت فيك ، فقوم يا بطل كدا أغسل وشك وأستهدي بالله وأرجع في قرارك الغلط وإبدأ من جديد ، صباحكوا فل .”
هيدي كرم في فيلم "عيلة دياب ع الباب"
في سياق منفصل، قد أعربت النجمة هيدي كرم عن بالغ سعادتها بالتعاون مع الفنان محمد سعد في فيلمه الجديد، مؤكدة أن العمل لا يزال في مرحلة التحضيرات، وأنهما ستجمعها عدة مشاهد سوياً خلال الأحداث ومع النجمة غادة عادل.
وأوضحت هيدي كرم أنها تقدّم شخصية كوميدية ضمن أحداث العمل، مؤكدة أن الشخصية بها تفاصيل جديدة ومختلفة عما قدمت من قبل: "الشغل مع محمد سعد مفرحني جدا وهو فنان موهوب وجميل وباقي الأبطال وإن شاء الله هنعمل حاجة حلوة مع بعض والدور مختلف وحلو وده اللي خلاني أقبل على طول".
