انفرد | ننشر نص التحقيقات في واقعة التعدي على "سائق الفردوس" بأكتوبر
قررت النيابة العامة بالجيزة، إخلاء سبيل متهم جديد في واقعة التعدي على سائق" الفردوس" بكفالة ماليه قدرها 10 آلاف جنيه، فيما حبست والده 15 يومًا على ذمة التحقيقات.
وحصل "نيوز رووم" على النص الكامل من تحقيقات النيابة مع المتهم الرئيسي في القضية أمام جهات التحقيق، فماذا قال؟:
س: ما الذي حدث إذا ؟
ج: " اللى حصل أن أنا كنت في البيت نازل رايح الشغل و لقيت مراتي كلمتني قالتلي إنها عملت حادثة و هي رايحة الشغل، روحتلها على طول لقيت العربية خابطها سواق فان جامد و بعدين كلمته بقوله أنت اللي طالع من الشارع بسرعة، باين إن هي رايحة كانت بتحاول تفاديك وأنت جاي بسرعة، قالي لا أنا مش غلطان و بيتكلم بكل استفزاز ولا مبالاة وراح جاي بعد كدة قعد يزعق و كدة، قولتله أنا يابني مش صغير واقف بتكلم معاك أنا فلان الفلاني وقعد يزعق أكتر".
وأضاف المتهم أمام النيابة: "قولتله يابني أنا بقولك كده بعرفك إني مش عيل صغير و هو مفيش بردوا، و بدأ يبقى في شد ما بينا وبعدين هو طبعا أحسن مني صحيا، فأنا حسيت إني بتهزم، روحت مكلم عيالي عشان يلحقوني جم بقى حصلت المشكلة و شد مع عيالي بردوا و مسك فيهم ومسك فينا كلنا و بعد ما خلص الموضوع و كل واحد مشي أنا حتى سعيت إني اجيب رقمه و كدة ، عشان حسيت إن الموضوع مش مستاهل لما روحت مکلمه وقولت له أنا هعمل لك اللى انت عايزه، و أصلحلك عربيتك و كدة و أي تكاليف عليا مرديش هو ده كل اللي حصل".
س: متى وأين حدث ذلك ؟
ج: الكلام ده حصل يوم الأربعاء بتاريخ ٢٠٢٥/٣/١٢ الساعة ٧:٣٠ صباحا بمدينة الفردوس - 6 اكتوبر .
س: وما سبب ومناسبة تواجدك بالزمان والمكان سالفي الذكر؟.
ج: أنا كنت نازل الشغل، مراتي كلمتني قالتلي أنا عملت حادثة بالعربية و السواق بتاع العربية نزل و زعقلي و زقني.
س: ومن كان برفقتك آنذاك ؟
ج: كنت أنا رايح لوحدي.
س: وما هي بادرة لقائك بالمجني عليه إسماعيل تحديدا ؟
ج: أنا أول لما روحت لقيته هو خابط مراتي بالعربية الفان بتاعته وواقف في الشارع، ولما روحت أتكلم معاه هو قعد يزعق ويعمل حاجات غريبة وكلام مش لطيف و كدة.
س: وما التصرف الذى بدر منك آنذاك ؟
ج: مفيش أي حاجة ساعتها أنا كنت بحاول أتكلم معاه عشان نوصل لحل، بس هو رافض و مش عايز، وعمال يقول أنا مش غلطان وأنا مش مصلح حاجة ومش هعمل حاجة خالص لحد لما بدأنا نمسك في بعض.
س: وما هي طبيعة ذلك الشد فيما بينكم على النحو المبين سلفاً ؟
ج: يعني لقيته وهو معلي صوته بدأ يتعافى عليا إكمني أكبر منه سنًا.
س: وما الداعي لقيامه بتلك الأفعال تحديداً ؟
ج: معرفش كل ده عشان بقوله إنت غلطان لأنه عارف أنه مد إيده على مراتي.
س: وما الأفعال التي بدرت منكم آنذاك ؟
ج مفيش لما لقينا مفيش حل بقى خلاص مشينا هنعمل إيه بقى عشان كل واحد يلحق دنيته و شغله.
س: ما قولك فيما شهد به المجنى عليه إسماعيل عبد الغني بتحقيقات النيابة العامة، من قيامك أنت و نجليك بالتعدي عليه بالضرب و الإتلاف عمدًا السيارة خاصته فضلاً عن قيام زوجتك بالاصطدام به عن عمد و رعونة منها، فأحدثت التلفيات الواردة على لسانه فما تعليقك على ذلك؟
ج: الكلام ده محصلش و إحنا مجيناش جمبه، بس هو اللي قليل الأدب ومستقر و مش عامل حساب لأي حد ولا لسني ولا الكلام ده كله، و هو اللي غلطان أصلا و خابط عربية مراتي.
س: هل من ثمة علاقة أو خلافات فيما بينك و بين سالف الذكر؟
ج: أنا معرفوش أصلا ولا في أي حاجة بيني و بينه.
س: ولماذا يدعى عليك سالف الذكر بذلك؟
ج: معرفش هو عايز إيه مع إني كلمته و راضيته.
س: هل سبق ضبطك في قضايا مماثلة ؟
ج: لا
