عيش وسيب غيرك يعيش..أسما شريف منير تنتقد الساخرين من نطق كلمة قرآن
انتقدت الإعلامية أسما شريف منير الذين يسخرون من نطقها الصحيح لكلمة “قرآن”، حيث نشرت مقطع فيديو عبر حسابها الرسمي على موقع تبادل الصور والفيديوهات إنستجرام توضح فيه حقيقة الأمر.
تعليق أسما شريف منير على الانتقادات التي تتعرض لها
وعلقت أسما شريف منير على هذا المقطع قائلة: “يعني بصوا، خلينا نقولها ببساطة، نفس الناس اللي بتقول “ما تحكمش عليّ” و”خليك متفتح”، هم نفسهم ساعات بيتريقوا على حد بس لأنه نطق “قرآن” صح أو حاول يكون ملتزم شوية، طب ما هو من حق كل واحد يعيش حياته زي ما هو شايف، ومن حق اللي بيحاول يكون قريب من ربنا إنه ما يتحطش في موقف سخرية، يعني لو بنقول “عيش وسيب غيرك يعيش”، نطبّقها على كل حاجة، ما ينفعش تبقى شايف إن تصحيح كلمة إنجليزية غلط حاجة مهمة، وبعدين تضحك على حد لأنه قال كلمة دينية صح، في الآخر كلنا بنتعلم من بعض، والاحترام هو الأساس، فخلينا نكون لطاف مع بعض، ونسيب كل حد ياخد رحلته مع ربنا من غير ما نحسّسه إنه غريب، في النهاية، الدين معاملة وكلمة طيبة، مش تريقة ولا حكم على حد”.
أسما شريف تشارك في مهرجان الجونة بالحجاب لأول مرة
في سياق منفصل، قد شاركت الإعلامية والإنفلونسر أسما شريف منير في فعاليات مهرجان الجونة السينمائي بدورته الثامنة، في أول ظهور لها بالحجاب، حيث حضرت لتقديم تجربة جديدة تحمل عنوان «عالم تاني»، دون أن تكشف عن تفاصيلها بعد، مؤكدة أنها لن تشارك في الريد كاربت هذا العام، وكتبت أسما شريف منير عبر حسابها على موقع تبادل الصور والفيديوهات إنستجرام: «دي أول مرة أحضر مهرجان الجونة وأنا محجبة، ومبسوطة جدًا، السنة اللي فاتت كنت لسه ببني شبكة علاقات لـ (عالم تاني)، بحضر أي ندوات أو ماستر كلاس تفيدني، وبقابل ناس وأتعلم، لكن السنة دي كنت متحمسة نطلع كفريق نعمل حاجة ليها معنى، وفجأة في 48 ساعة كل حاجة اتغيرت».
وأضافت:«كنت ناوية مأسافرش، خصوصًا إني لسه محجبة ومعنديش لبس كفاية، ومجهزتش نفسي، بس ربنا بيبعت الفرص لما تكون جاهز من جوه، مش من بره. لما حد صدق في اللي بنعمله وقالنا “تعالوا السنة دي، عندكم حاجة تستحق التقديم”، قررت أروح وأقدم حاجة تمثلني أنا وعمرو في (عالم تاني)، وأعرّف الناس أكتر على المشروع».
وأكملت أسما:«حضرت مهرجان الجونة قبل كده بأشكال مختلفة، مرة كمكياج آرتيست، ومرة كإنفلونسر، ومرة علشان (عالم تاني)، لكن دي أول مرة أحس إني بظهر على طبيعتي وبتعبّر عني فعلاً، فخورة بكل اللي بنحققه بتوفيق ربنا ومجهود فريقنا اللي بيحارب علشان حلمنا كل يوم».
واختتمت حديثها قائلة:«استنوا اللي جاي… أنا في الجونة مش علشان الريد كاربت، أنا هنا علشان (عالم تاني) يكون موجود زي ما يستحق. شكرًا لكل اللي صدق وساعد وشجع، وشكرًا لنفسي إني كملت حتى لما كنت فاكرة إني مش هقدر… بحبكم».
