جربت الشرب ودعيت على أمي.. تصريحات صادمة من أسما شريف منير
حلت البلوجر أسما شريف منير، ضيفة على بودكاست يمنى النهارده، وتحدثت خلاله عن حياتها قبل الحجاب، كما كشفت كواليس وفاة والدتها.
أسما شريف منير تتحدث عن حياتها قبل الحجاب
وقالت أسما: "قابلت ناس بيقولوا إن الشرب مش حرام، مقتنعين بكده وعندهم عقائد مختلفة، بس دايمًا كنت بسأل : هل ربنا قالك روح اشرب؟ ولا دا الشيطان اللي بيقولك كده؟، لما تحس إنك محتار، لازم تفرق بين كلام ربنا وكلام الشيطان".
وأكملت : "أنا جربت الحياة دي، سافرت، وسهرت، وعشت كل حاجة من غير قيود، بس عمري ما ارتحت، كنت دايمًا حاسة إني بعمل حاجة غلط، وإن اللي بعمله مش بيرضي ربنا."
دعيت على أمي إنها تموت
وعن وفاة والدتها، قالت أسما شريف منير: "دعيت على أمي إنها تموت علشان ترتاح، لأنها كانت تعبانة أوي وعندها كانسر، وماتت قبل عيد ميلادي بيوم، والناس كنت بتكلمني تعيد عليا وبعدها يعرفوا الخبر ويكلموني تاني يقولولي البقاء لله".
وواصلت: "أكتر لحظة صعبة في حياتي لما روحتلها قبل أما تموت بيوم، وكانت خاسة أوي، وكنت حاسة أنها بتودعني، ودعيت يومها إن ربنا يريحها، وحسيت بالذنب فترة وكأني أنا السبب".
كواليس ارتداء أسما شريف منير للحجاب
يُذكر أن البلوجر أسما شريف منير، سبق وكشفت مؤخرًا، كواليس ارتدائها للحجاب، مؤكدة أهمية الحفاظ عليه، وذلك من خلال حسابها على إنستجرام.
وشاركت أسما صورة لها بالحجاب، وكتبت : "شوفت بعيني جوزي وهو بيحس إنه لازم يحميني ..بيتقلب قلبه لو راجل بصلي بنظرة مش كويسة ..ولازم يصد عني أي أذى .. وكبرت وأنا بسمع أبويا بيحكيلي إزاي أصون جسمي .. إزاي كأب ممكن يضحي بنفسه علشان يحافظ عليا".
وأضافت: "طب لو دي مشاعر جوزي وأبويا .. أمال ربنا، اللي خلقني وبيحبني أضعافهم كلهم ..هيعمل إيه علشان يحميني من شياطين الإنس والجن؟ .. ربنا ببساطة قالي غطي نفسك .. مش علشان يخنقني ولا يضيق عليا .. بالعكس علشان يكرّمني .. يصون قلبي قبل جسمي ..ويحميني من نظرات ممكن تجرحني أو تكسّرني".
واختتمت أسما شريف منير: "الحجاب مش قيد .. الحجاب أمان ..الحجاب مش منع، الحجاب ستر وكرامة .. هو ده حب ربنا .. حب بيحميني من اللي مش شايفين قيمتي".
