قرار كان بقاله سنين.. ياسمينا العلواني تعلن ارتداء الحجاب واعتزالها الفن
فاجئت المطربة الشابة ياسمينا العلواني متابعيها عبر فيسبوك، بالكشف عن قرار جديد في حياتها، وهو ارتدائها للحجاب، حيث شاركت العلواني فيديو لها على فيسبوك تحدثت خلاله مع جمهورها.
ياسمينا العلواني تعلن ارتدائها الحجاب
وبدأت ياسمينا العلواني حديثها بإعلان ارتدائها الحجاب، حيث قالت: أول ما فتحت الكاميرا مكنتش عارفة هقولكم إيه في الفيديو، ولكن بعد ما بدأت أتكلم عرفت إن الشكل باين أنا عايزة أقول إيه ومش محتاجة إني أقول كلام كتير، أول حاجة كل سنة وأنتم طيبين وعيد سعيد عليكم ويارب كلكم متجمعين في الخير، أنا قررت إن أتحجب والقرار ده أنا مش وخداه إمبارح ولا وخداه أول أمبارح، القرار ده بقاله سنين معايا عمال يروح ويجي.
وأكملت العلواني: وده لأني بحسبها بدماغي كتير، ولكن المره دي لما قررت إني أحسبها بدماغي وقلبي الإتنين مع بعض لقيت إن هما الاتنين واخدين نفس القرار، اللي هو انتي بتفكري في إيه، دي حاجة مش محتاجة إنك تفكري فيها أصلًا، دي حاجة لازم كلنا كبنات نعملها أصلًا، وأي بنت مش محجبة لازم في يوم من الأيام تاخد الخطوة دي وتتحجب لأن ديننا عايز مننا كده وأكيد ده له سبب.
وأضافت ياسمينا: وما دام الحجاب فرض علينا فهو فيه خير لينا، ومش لازم يبقى شكلنا حلو بس، يعني قلبنا لازم يبقى حلو وأخلاقنا أحلى، وده اللي المفروض نهتم به، وأنا شايفة إن طول ما البنت بشعرها أو أنا يعني بلاش أتكلم عن البنات كلها، وطول ما البنت بشعرها بحس أن هي بتهتم بشكلها إنه يطلع حلو، وأنا حاسة إني لما أتحجب هحس إن أنا محتاجة أنمي جو وأحسن من جو.
وواصلت : يارب تكون خطوة حلوة، وأنا عارفة إن في ناس كتير هتضايق وناس كتير أوي مش هتضايق وهتتبسط لي أكيد، الناس اللي بتحبني هتتبسطلي أكيد، وعارفة إن حياتي من النهارده بتتغير، وعارفة إنها بتتحول 360 درجة.
خطوات ياسمينا العلواني المقبلة
واختتمت ياسمينا العلواني حديثها بالكشف عن خطواتها المقبلة قائلة: والله العظيم أنا بكلمكم وأنا مش مرتبة الكلام، وكان في شغل أنا متفقة عليه عارفة أنه خلاص مش هيبقى موجود وحياتي هتتغير وشغلي كله هيتغير ومتوترة أكيد، لإني داخلة على حياة جديدة من أولها لآخرها، ومش عارفة هعمل إيه بس اللي واثقة منه إن أنتم هتدعموني وإن أنتم مش هتسيبوني، ويارب نولها لأي حد نفسه فيها، كل سنة وأنتم طيبين.
بداية شهرة ياسمينا العلواني
يُذكر أن ياسمينا العلواني ظهرت على الساحة الغنائية في برنامج المواهب الغنائية عرب جوت تالنت في عام 2014، واكتسبت وقتها شهرة واسعة بعد حصولها على الباز الذهبي من الفنانة نجوى كرم، بعدما غنت ياسمينا أغنيتي "عن العشاق وإنت عمري" لكوكب الشرق أم كلثوم في مرحلة تجارب الأداء.
