"سيبوها تختار حياتها".. 3 رسائل من نهاد أبو القمصان بعد عودة شيرين لحسام حبيب
نشرت نهاد أبو القمصان، المحامية الحقوقية ورئيس المركز المصري لحقوق المرأة، فيديو جديد على صفحتها الرسمية بموقع التواصل الاجتماعي "فيس بوك" بعنوان "3 رسائل في رجوع شيرين لحسام حبيب"، وجهت فيه انتقادات ورسائل صريحة لعدد من الأطراف المرتبطة بأزمة الفنانة شيرين عبدالوهاب وحسام حبيب.
وقالت أبو القمصان في بداية رسالتها: " شيرين رجعت لحسام حبيب.. بعيدًا عن مؤامرة إن البانيه هيغلى لأنه كده كده هيغلى بيهم أو من غيرهم.. أنا عندي 3 رسائل".
لتدخل بعدها في تفاصيل ثلاث رسائل مباشرة قائلة: "الرسالة الأولى للمحامي بتاعها انتشر على السوشيال إنه عامل بيان وبيقول إنه غير راضٍ.. احنا دورنا كمحاميين مش إننا نشتغل أوصياء على قرارات الناس نوافق أو منوافقش.. إحنا دورنا إننا نديهم الرأي القانوني المنضبط.. وإنه الناشر عن الموكلين الحقيقة يخالف بمهنة المحاماة وبصورتنا احنا كمحامين ده اسمه إهدار لخصوصية البيانات".
نهاد أبو القمصان تنتقد المحامي والمجتمع وشقيق شيرين: "مش محتاجة وصاية.. محتاجة حب"
وأضافت: "الرسالة الثانية للمجتمع كله: انتو مالكو على فكرة اللي بيسأل الدكاترة النفسيين هو ده ينفع؟ أنا فاهمة إن شيرين محبوبة وكل حاجة بس من واقع الخبرة العملية مفيش حد بيطلق عشان شتيمة وضرب.. الحالات دي بتتكرر تقريبا يوميا.. واحنا بنبقى هنتشل بس مينفعش نبقى أوصياء على قرارات الناس وحالة شيرين متكررة كل يوم".
وتابعت: "الرسالة الثالثة لمحمد أخو شيرين: شيرين مش محتاجة حد يفرض عليها قوامة شيرين محتاجة حد يفرض عليها حب وانها تحس إن اخوها مش متحكم في فلوسها . هي محتاجة دعم ومساهدة محتاجة إنك كنت تقولها أنا واثق فيكي وفي قراراتك وجربي ولما تغلطي أنا موجود.. لو اللغة دي استُخدمت مع شيرين وحست طول الوقت إن أهلها في ضهرها مكنتش وصلت للحالة دي".
أول رد من شيرين عبدالوهاب على أنباء عودتها لحسام حبيب
وفي أول تعليق رسمي لها، خرجت الفنانة شيرين عبدالوهاب عن صمتها لتضع النقاط على الحروف بشأن ما قاله وكيل أعمالها السابق عن عودتها لحسام حبيب، مؤكدة أن ياسر قنطوش لم يعد يمثلها قانونيًا في أي شأن، وأنها لا تربطها به أي صلة حاليًا.
وقالت شيرين في بيان نشرته عبر حسابها الرسمي على منصة "إكس": "أخاطب جمهوري العزيز مباشرة، وأطمئنه أنني أدرك خطواتي جيدًا، فمسيرتي الفنية الطويلة وما مررت به من مواقف وتجارب سواء كانت جميلة أو صعبة منحتني الخبرة الكافية لاتخاذ قراراتي بنفسي".
