شمس البارودي بعد التصديق على قانون الإيجار القديم: لو ربنا مد في عمري هعمل إيه
عبرت الفنانة شمس البارودي عن صدمتها ودهشتها بعد التصديق على إقرار قانون الإيجار القديم، حيث نشرت الجريدة الرسمية في عددها الصادر اليوم الإثنين قرار رئيس الجمهورية عبدالفتاح السيسي بالتصديق على قانون الإيجار القديم بعد إقراره من مجلس النواب.
اتصدمت من الأخبار المتداولة وأصبت بدهشة وخضة
وكتبت شمس البارودي عبر حسابها بموقع فيسبوك: “اتصدمت من الأخبار المتداولة وأصبت بدهشة وخضة والله اتخضيت، وحاولت صديقتي تخرجني من خضتي ودهشتي وإحباطي وقهري بعد صدور قانون العيب المش عارفة حيعمل فينا إيه لو ربنا مد في عمرنا فوق السبع سنين خصوصًا”.
قادر ربنا يمد في عمري خصوصًا إني ست حياتي القرآن والصلاة والأكل الصحي
وأضافت شمس البارودي: "أنا شايفة قمرات معلش حتى لو بعمليات التجميل عدوا الـ ٨٦ سنة. يعني قادر ربنا يمد في عمري زي ما مد في عمر الحلوات دول خصوصًا إني ست حياتي القرآن والصلاة والأكل الصحي حعمل إيه وقتها بقى؟ وعندى سؤال يلح عليه هما المحظوظين اللي ربنا كرمهم واشتروا شقق في عمارة جنبي وقت إحنا ما أجرنا واشتروها في السبعينات بخمسة آلاف من الجنيهات حتعملوا معاهم إيه وأنا دافعة بسنين الإيجار ثمن الاشتروه وأكتر كمان والله!
وتابعت: “مش قصدي حاجة ربنا يديم عليهم شققهم يا ريتنا اشترينا بس ياريت عمرها ما كانت بتعمر بيت، عمومًا خرجتني نجوى من الخضة والصدمة عاملة شبه صدمت الزوجة لما تكتشف زوجها الواثقة فيه بيخونها علنا فهمي رسمى نظمي”.
وأكملت: "تصوروا يا أحبابي أنا أتعرض عليا فيلا مدام هنوا اللي بعد خريستوا مطعم السمك اللي في آخر شارع الهرم أمام أوتيل اوبروى الهرم، كلمتنى مدام هنوا وقالت لى عاوزة أبيع الفيلا وماتنفعش تقعد فيها غيرك الفيلا عاوزة برنسيسة زيك مدام شمس، ده كلام مدام هنوا والله بكام مدام هنوا قالت لي علشانك أنتي بـ ٧٥ ألف بس يالهوي وقتها في السبعينات ده مبلغ كبير طبعا شكرتها وأعتذرت لهآ، اخدتكم في حواديت كتير تفتكروا كم الإجهاد النفسي ده مقصود علشان نخلص بدري بدري قبل السبع سنين؟!
وأردفت: “عموما حنقعد نتفرج على الملاك وفرحتهم فينا وفرحتهم بفسخ العقد المبرم بالتراضي”
