شمس البارودي عن قانون الإيجار القديم: مش هخرج من بيتي ولو بعد 10 سنين|خاص
علقت الفنانة شمس البارودي على إقرار قانون الإيجار القديم، التي قد تؤدي إلى فقدانها شقتها، وهي شقة الزوجية وبها جميع ذكرياتها مع زوجها الراحل الفنان حسن يوسف.
وقالت شمس البارودي في تصريحات لـ نيوز رووم: “أنا بدفع الفين جنيه في الشهر.. وبيزود علينا ومش بنقول لأ، ولو عاوز يزود تاني مفيش مشكلة، لكن عيب تقولي أخرج بعد كام سنة.. أنا ما شفتش القانون ده في حياتي، فيه حاجة اسمها قانون العيب قال عليه السادات إنك تيجي تقول لحد هوديك مكان تاني واطلع بره بيتك.. عاوز تزود للمستأجر زود له بالمعقول”.
وأضافت شمس البارودي: “العقد لما اتعمل ادفع عليه خلو وفي الوقت نفسه المالك كان في وعيه.. أنا أساسًا مش هورث لأولادي.. لكن لو ربنا مد في عمري بعد سبع سنين تخرجني؟ ما يمكن ربنا يمد في عمري، أنا مش هخرج ولا بعد عشر سنين”.
إحنا مش أغنياء غناء فاحش
وتابعت شمس البارودي: “أنا ونيللي قد بعض مواليد 45 وبنت خالة نيللي أكبر مننا بسبع سنين وربنا مادد في عمرها… قانون العيب هو اللي محتاجين نفعله، ما تقولش لحد اطلع بره هو كده كده ميت، وأنت هتقابل ربنا وكلنا هنقابل ربنا.. محدش بياخد حاجة معاه.. وجوزي سترنا بالستر والحمد لله إحنا مش أغنياء غناء فاحش”.
وأردفت: “في العمارة اللي أنا ساكنة فيها فيه شقق فضيت وصاحب البيت بيأجرها بالدولار… وابني كان عايش بره جه هنا يأجر شقة أجرها بالدولار”.
آخر أعمال الفنانة شمس البارودي
تجدر الإشارة إلى أن شمس البارودي اعتزلت في قمة نجاحها وشهرتها، بعد أن شاركت في آخر أعمالها عام 1984 وكانت انتهت من تصويره قبل قرار الاعتزال وهو فيلم "اثنين على الطريق" بطولة عادل إمام وعادل أدهم ووحيد سيف وصلاح نظمي، ومن إخراج حسن يوسف، وتأليف فاروق صبري.
