حفيدة إسماعيل ياسين بعد اعتذار عمرو سلامة: "قلت الناس مش هترحمه.. ومخدتش في إيدهم غلوة"|خاص

علّقت سارة ياسين حفيدة الفنان الراحل إسماعيل ياسين على اعتذار المخرج عمرو سلامة بعد التصريحات التي أساء فيها لجدها الراحل، مؤكدة أن الجمهور لم يتهاون في الدفاع عن جدها.

وقالت سارة ياسين إسماعيل ياسين في تصريح خاص لـ "نيوز رووم":"مش هنعلق للناس المشنقة، قلت لك الناس مش هترحمه وفعلًا مخدتش في إيدهم غلوة، ده الحال لأي حد يسيء لنجوم زي دول وعلى رأسهم إسماعيل ياسين، الناس بتقول مش اعتذار بشكل مباشر، قال هتقارنوا نملة بأسد، يقول إيه أكتر من كده؟"
 

وأضافت سارة ياسين: "الفكرة كلها إن فيه رموز في الفن، وفي التاريخ عامة، الأدبي والسياسي، على مختلف المجالات، الرموز دي كانت جزء من تاريخ مصر وثقافتها وحضارتها.. إيه اللي هيفيد بني آدم لما نقول كلام مش مبني على نقد؟ ناقشني وكلمني، إنت مش عاجبك في الأداء إيه؟ بنقد احترافي كلمني عن إيه الحاجات اللي إسماعيل كان محتاج يشتغل عليها ويطورها في نفسه ونتناقش بشكل موضوعي، لكن تطلع تضرب كلمة بشكل مش عفوي وبشكل متهور من غير توضح المعنى اللي ورا الكلام.. ليه؟"

عيب لاسمه، هو مش صغير

وتابعت حفيدة إسماعيل ياسين: "عيب لاسمه، هو مش صغير، هو صغير سنًا علشان يقول كلام مش موزون، بما إنه صانع سينما، يبقى المفروض لما يقول نقد يقوله بطريقة احترافية، وفيها بنود معينة بيناقشها، وبيتكلم بروفيشنال عن أداء إسماعيل، زي ما كل النقاد بتكتب، مش بطريقة فيها إساءة. عيب لسنه، هو المفروض أوعى وأنضج من كده."

سارة ياسين تشكر جمهور جدها الراحل

واختتمت سارة ياسين: “بشكر جمهور إسماعيل اللي ما استحملش عليه كلمة، وحد يغلط فيه نص كلمة، وهم دول اللي في ضهرنا، وبيردوا قبلنا، وبياخدوا حق إسماعيل وبيترحموا عليه، دول بيجيبوا حقه تالت ومتلت”.

القصة الكاملة لتصريحات عمرو سلامة والهجوم عليه

بدأت الأزمة عندما ظهر عمرو سلامة في برنامج "ليك لوك" مع الفنان عمر متولي، وصرّح بأن إسماعيل ياسين لم يعد معروفًا لدى الجيل الجديد، قائلًا:" إسماعيل ياسين أسوأ ممثل في تاريخ السينما، وأنا مضايق من نسخة الطفل اللي كانت بتضحك على إسماعيل ياسين، ومفيش حد دلوقتي من الجيل الصغير عارف مين هو."

من ناحيتها، ردّت حفيدة الفنان الراحل إسماعيل ياسين على تصريحات المخرج عمرو سلامة بشأن جدها، مؤكدة أن التاريخ لا يمكن محوه، وأن الجمهور هو الحارس الحقيقي لإرث الفنانين الكبار.

وقالت في تصريح خاص لـ "نيوز رووم":"فيه نقاد كبار أصحاب تاريخ معروف أشادوا بعبقرية إسماعيل ياسين، واجتهاده، وذكائه، مش منطقي إن حد يجي دلوقتي ويحاول يمحي تاريخه. واضح إنه عاوز يعمل فرقعة وشو، لأن أي حد عايز يلفت الانتباه بيتكلم عن القامات الفنية الكبيرة."

إجراء قانوني قيد الدراسة

وأضافت:"أنا لسه عرفت بالموضوع، وهستشير ماما وأختي، وهنبحث مع نقابة المهن السينمائية إذا كنا هناخد إجراء قانوني ولا لأ. في النهاية، الجمهور هو اللي بيرد، وهو اللي بيحفظ اسم إسماعيل ياسين، سواء خلال حياته أو بعد وفاته، وكل محاولات التقليل منه بتقابلها موجة دفاع قوية من محبيه."

أما عن تصريح عمرو سلامة بأن الجيل الحالي لم يعد يعرف إسماعيل ياسين، فقالت:"الموضوع مش متعلق بجدي بس، فيه نجوم كبار زي فاتن حمامة، رشدي أباظة، هند رستم، في فئة عمرية معينة مش بتحب تتفرج على أفلام الأبيض والأسود، لكن ده لا يعني إن قيمتهم أو تأثيرهم انتهى، وإحنا مش محتاجين نوجّه رسالة للناس دي، الموضوع ببساطة إننا إما هنلجأ للقانون، أو هنسيب الجمهور يرد بنفسه."

اعتذار عمرو سلامة

بعد موجة الغضب التي قوبلت بها تصريحاته، خرج عمرو سلامة صباح اليوم ليقدّم اعتذارًا رسميًا، قائلًا:"أتقدم بخالص اعتذاري لجمهور ومحبي جميع الفنانين الذين ذكرتهم في حلقة برنامج (ليك لوك)، ولكل من شعر بالإساءة بسبب إبداء آرائي بصورة مبالغ فيها وغير لائقة، مما قد يكون قد مسّ تاريخهم الفني الكبير والمهم.

وأضاف عمرو سلامة: “أدرك تمامًا أن مكانة هؤلاء الفنانين وتأثيرهم في الثقافة الشعبية لا يمكن المساس بهما، وأتعجب من البعض الذي قرر مقارنتي بهم، فهذه مقارنة في غير محلها تمامًا. هم أصحاب تاريخ فني عظيم أثر في ملايين البشر لعقود، ومقارنتي بهم لا معنى لها، كما لو أن نملة تُقارن بأسد”.

وتابعت: “كما أقرّ بأنني ارتكبت خطأ كبيرًا، وهو عيب حقيقي في شخصيتي، حيث أن عفويتي أحيانًا تصل إلى حد التهور. لم أدرك أن ما يُقال في منصة عامة يجب أن يكون محسوبًا بدقة، ولا يمكن التعامل معه كحديث عابر في جلسة خاصة بغرض التسلية والمبالغة الهزلية. ما نقوله في العلن يبقى ويؤثر، ولذلك يجب أن أكون أكثر وعيًا ومسؤولية فيما أصرح به مستقبلاً”.

واختتم عمرو سلامة: “أكرر اعتذاري، وأتعهد بأن أكون أكثر حرصًا في المستقبل”.

تصريحات أخرى مثيرة للجدل

لم يكن إسماعيل ياسين وحده محور تصريحات عمرو سلامة، فقد انتقد أيضًا المخرج الكبير صلاح أبو سيف، واصفًا إياه بأنه "مبالغ في تقديره" (Overrated)، كما اعتبر أن فيلم "المومياء" للمخرج شادي عبد السلام نال إشادة أكبر مما يستحق.

محمد أبو سيف يرد: "مش كلامه اللي هيأثر في أبويا"

في رد قوي على هذه التصريحات، علّق المخرج محمد أبو سيف، نجل المخرج الراحل صلاح أبو سيف، قائلًا في تصريحات لـ "نيوز رووم":"مين عمرو سلامة ده؟ أنا معرفوش، ومش بعلق على التفاهات دي. اللي يضايقني هو لما حد له قيمة هو اللي يتكلم."

وأضاف:"السوشيال ميديا بقت بتدي فرصة لأي حد يتكلم عن القامات الكبيرة لمجرد التريند، لكن كلامه مش هيأثر في اسم صلاح أبو سيف. شادي عبد السلام وصلاح أبو سيف هما أكتر اتنين رفعوا اسم مصر في العالم، والنوع ده من التصريحات لا يستحق الرد أصلاً."