ندى بسيوني: شبح تخلي الأهلي عن معلول يطارد وسام أبوعلي
طرحت الفنانة ندى بسيوني، المعروفة بتشجيعها ودعمها المتواصل للنادي الأهلي، تساؤلًا مثيرًا حول ارتباط رحيل اللاعب وسام أبو علي عن النادي الأهلي بما حدث مع اللاعب علي معلول، مشيرة إلى أن الأخير كان رمزًا للإخلاص والتفاني في حب القلعة الحمراء، وقدم الكثير للنادي، وكان لا يزال لديه ما يقدمه.
وقالت ندى بسيوني، في تغريدة لها عبر حسابها على منصة "إكس": "معلول وحبه وإخلاصه للأهلي، لا ينسي ولا يعوض قدم كتير، وكان لسه عنده كتير يقدمه، يا ترى إصرار وسام علي الرحيل له علاقة بحكاية معلول، يعني خاف علي نفسه وضياع فرصة مادية كبيرة وهو أصلا مش متعلق بالأهلي زي معلول اللي بقاله سنين متفاني في النادي مثلا ؟!! مجرد خاطر خطر لي".
في سياق آخر، وصف الناقد جمال عبدالقادر صفقة بيع اللاعب وسام أبو علي بأنها "صفقة ناجحة بكل المقاييس"، مؤكدًا أن اللاعب جاء بمقابل بسيط وحقق بطولات، ثم تم بيعه بأرباح ضخمة، معتبرًا أن ما حدث يمثل نموذجًا للاستثمار الرياضي الناجح.
وقال عبدالقادر، في منشور له عبر حسابه الرسمي على موقع التواصل الاجتماعي "فيس بوك": " صفقة وسام أبو علي، صفقة ناجحة بكل المقاييس، لاعب دخل النادي من سنة ونص بمليون ونصف دولار ساهم في الحصول على أكثر من بطولة وأخيرا تم بيعه بأكثر من 9 ملايين دولار".
وأضاف: "كان فيه رغبة أنه يكمل علشان يحقق بطولات أكثر، لكن برضه الرقم المعروض مش هيتكرر، ده غير أنه هيتمرد ومش هتاخد منه حاجة تاني".
وأردف جمال عبدالقادر: "اللعبة مفروض أنها بيزنس، استثمار و ربح للأندية ومصدر دخل للاعب بقول مفروض أنها كده، الكلام عن انتماء و عواطف كلام فاضي وبيتم استخدامه حسب المزاج والمصلحة".
جمال عبدالقادر: التاريخ مش دايمًا في الحسبة والرقم هو اللي بيحكم
واختتم الناقد الفني جمال عبدالقادر منشوره قائلًا: "فكرة إنك توصف اللاعب اللي خارج من عندك علشان مصلحته وبحثا عن رقم أعلى أنه خاين ده كلام مسخرة وعيب تقوله لأنك في موضع آخر بتوصف اللاعب اللي دخل عندك لنفس السبب بأنه اختار التاريخ والجغرافيا وأنت عارف ان كله اختار الرقم الأكبر والتاريخ مش دايما في الحسبة.. استقيموا وبلاش اوفر دي في الآخر لعبة".
