شمس البارودي لـ نيوز رووم: "إيه المشكلة لما الفنانة تمثل بالحجاب؟
كشفت الفنانة المعتزلة شمس البارودي، رأيها في ارتداء الفنانات للحجاب أثناء التمثيل، مؤكدة أنه لا مانع من الجمع بين الاثنين.
وقالت شمس البارودي في تصريحات خاصة لـ نيوز رووم:"إيه المشكلة لما الممثلة تمثل بالحجاب؟ عفاف شعيب بتمثل وهي محجبة، ولو فيه دور لا يتناسب مع الحجاب يبقى الأفضل بلاش منه، وأنا شايفة الحجاب فرض، لكن غيري مش شايف كده".
وأضافت شمس البارودي: "كنت بنصح الفنانات زمان واتهاجمت، لكن مفيش حاجة دايمة، وفي النهاية العبرة بالخواتيم والأعمال بالنيات".
وعن ظهورها بمايوهات في أعمالها، أوضحت شمس: “اللي عملته مفيش فنانة مكنتش بتعمله، وكل فنانات جيلنا ظهروا بمايوهات في أفلامهم، زي نادية لطفي وسعاد حسني وفاتن حمامة وميرفت أمين ونجلاء فتحي، ومع ذلك أنا خدت قرار اعتزالي وارتداء الحجاب وأنا عندي 36 سنة ومكانش فارق معايا حد غير الله، ربنا بس هو اللي كان مطلع على نيتي".
وأضافت شمس البارودي: "مكنتش أحب البس مايوه في أفلامي وبتبرأ من المشاهد دي، ومفيش نجمة تبرأت من أعمالها حتى سهير رمزي وشهيرة شالوا الحجاب وأنا ما زلت متمسكة بحجابي وحباه".
وأكدت شمس البارودي أنها لا ترى نفسها أفضل غيرها، قائلة: “أنا لا أزكي نفسي على أحد، واتعلمنا من النبي صلى الله عليه وسلم، إن الدين يسر وإن المنبت لا أرضًا قطع ولاظهرًا أبقي، وما خير رسول الله إلا واختار أيسرهما ما لم يكن إثم”.
شمس البارودي ترفض تقديم سيرة زوجها حسن يوسف في عمل فني
في سياق آخر، أكدت الفنانة المعتزلة شمس البارودي رفضها التام لفكرة تقديم سيرة زوجها الفنان الراحل حسن يوسف في عمل فني، رغم ترشيح الفنان تامر حسني لذلك في وقت سابق، حيث قالت: "إحنا رافضين تمامًا تقديم سيرة حسن يوسف، ومش مرشحين أي فنان يقوم بالدور، وعمر ابني يجهز لفيلم وثائقي عن والده تمثيل وإنتاج وإخراج ودراسة، وأنا شجعته على الخطوة دي”.
