أحمد الفيشاوي لفاتن حمامة: أخيرًا استخدمت مخي.. الله يرحمك يا ماما «تونة»
استعاد الفنان أحمد الفيشاوي لحظة مؤثرة من بدايات مشواره الفني، عبر نشره مقطع فيديو نادر للنجمة الراحلة فاتن حمامة، ظهرت فيه وهي تشيد بموهبته وتوجه له نصائح حاسمة بشأن الالتزام والانضباط.
وكتب الفيشاوي تعليقًا على الفيديو، عبر حسابه الرسمي على موقع "إنستجرام":" أنا أتشرف أن حضرتك زنبتيني، وأنا متأكد إنك دلوقتي فخورة بيا عشان أخيرًا استخدمت مخي وظبطت مواعيدي.. الله يرحمك يا ماما تونة، النجمة العالمية الكبيرة أستاذة فاتن حمامة."
الفيشاوي يرد على نصيحة فاتن حمامة بعد سنوات
وكانت فاتن حمامة قد ظهرت في اللقاء قائلة: "فيه أحمد مثلا الفيشاوي شاب بيبتدي.. أنا أعتقد إنه هيبقى ليها مستقبل كبير أوي لو استعمل عقله وبقوله تاني ونفسي يسمعنى بقول "لو استعمل عقله، أحيانا برده كان بيبقى مهمل في مواعيده ذنّبناه شوية".
في سياق آخر، كان قد حل الفنان أحمد الفيشاوي ضيفا في "بودكاست" "حوارات مع عباس" الذي يقدمه الفنان عباس أبو الحسن. وأثناء اللقاء، كشف عن سبب رغبته في العيش وحيدًا بمفرده وبدون زوجة ولا أبناء، مؤكداً أن الأمر متعلق بحبه للفن وصناعة السينما.
وقال أحمد الفيشاوي: "أنا شخصية عايز أبقى لوحدي تمامًا، وأنا كده بقالي 6 سنين ولو ربنا إداني العمر هفضل لآخر نفس عايز أعيش لوحدي، لأني لما بعيش لوحدي معنديش رفاهية أني أخون حد أو حد يخوني، ولا أكذب على حد ولا حد يكذب عليا، ولا أنكد على حد ولا حد ينكد عليا، وأنا لو عندي زوجة أو عيال في البيت مش هعرف أعمل السينما اللي أنا عايزها، لا ضرر ولا ضرار".
تفضيل الوحدة
وتابع أحمد الفيشاوي: "واحدة من مراتاتي قالتلي أنت لو سبتني هتموت لوحدك، والست دي إدتني سكة عمري ما فكرت فيها، وعمري ما كنت هاكمل في الإخراج اللي أنا عايزه، وقلت ليه يبقى عندي 70 ولا 80 سنة وحواليا عيل بيعيط وبنجيب له أدوية وبامبرز، أنا في الآخر هدخل القبر لوحدي ليه يبقى حواليا دوشة وأنا بعد ساعتين هبقى تحت الأرض؟، ما أنا ممكن آخر ساعات في حياتي أقضيها لوحدي على سريري أقول يا رب ارحمني أنا بموت".
