بتول الحداد تطلب الاستغاثة.. برلماني سابق عايز يتجوزني غصب عني وبتعرض للعنف
ظهرت الفنانة بتول الحداد وهي منهارة في البكاء في فيديو لها عبر صفحتها الرسمية على موقع التواصل الإجتماعي “ انستجرام ” وطلبت الاستغاثة بعد تعرضها للضرب والإهانة والابتزاز من برلماني سابق يريد الزواج منها غصبا عنها .
وقالت بتول الحداد: أنا بتول بكل أسف بيتعرض لي شخص كان نائب سابق في مجلس الشعب مش قادرة أقول اسمه عشان ميبقاش سب وقذف بعد كل اللي بيحصل فيا.
وأوضحت: كنت بحبه سنتين وهو بيحبني، وكنت دايما برجع وأقول أنه مينفعش وإن هو مسيحي وأنا مسلمة وإنه مش هينفع، اتفقت أنا وهو إننا منكملش عشان مش هينفع.. جالي خطوبة اتنين من أصدقائي وعملي مشكلة والناس لما شافوه بياخدني من وسطهم اتخانقوا معاه وأنا نزلت جري قعدت في عربيتي عشان مش عارفة أروح فين..وعشان خايفة أروح بيتي وخايفة على نفسي على أصحابي. كلمته قلت له لو عندك مشكلة معايا تعالى حلها معايا وبلاش فضايح قدام الناس أنا معروفة وأنت معروف وبلاش تعمل كده ضربني في العربية وشي وارم ورقبتي وارم لدرجة أن الناس بتوع الباركينج شالوه من فوقي قبل ما يموتني.
وتابعت: أنا بعمل اللايف ده بناء على نصيحة حد أعرفه كويس قال لي ده اللي ينقذك أنا لا عايزة أعمل لايف ولا عايزة فضايح لنفسي ولا لحد، بس أنا لو حصل لي حاجة أو شركتي حصلها أو صحابي او أهلي حصلهم حاجة هيبقى الإنسان ده هو السبب.
أنا مش عارفة أروح فين ولا آجي منين ولا قادرة أروح بيتي لأنه لما بيعرف أنا فين بيروح المكان وبيعمل مشاكل ودي مش أول مرة من سنة عمل كده وضربني في الشارع والناس حاشوه عني.
استغاثة
ووجهت الكلام لمتابعيها انا بستنجد بيكم وانكم تقفوا جنبي مش عايزه أكمل في حاجة غصب عني، أنا اتهنت وانضربت عايشة تحت التهديد وطول الوقت باحاول أتكلم مع البني آدم ده لأنه طول الوقت بيبتزني ومعيشني في رعب ورهبة وانا طول الوقت بحاول اتكلم معاه واهدي الدنيا عشان أبقى عايشة في أمان.. بس أنا خلاص أنا يا إما هموت نفسي عشان أنقذ نفسي من البني آدم ده يا إما هو يبعد عني ويتعهد أنه يبعد عني.
وتابعت: ده واحد مصمم نبقى مع بعض بالعافيه هو مسيحي وأنا مسلمة يعني مصيبة كل مرة كنت بحاول أبعد كنت بتأذي وانضر وكنت بحاول أمشي الدنيا من غير ما أعمل حاجة غلط.. بس أنا خلاص حاسة أني في كابوس ومش عارفة أفوق منه.. حاولت أسيب البلد كلها وأمشي مش عارفة لأن شغلي هنا ومستقبلي هنا، بقالي 13 سنة شغالة في التمثيل من وأنا في أولى معها.
