محمد نور: مصورتش جنازة أبويا وماكنتش مستوعب وفاته لمدة 20 يوم
تحدث الفنان محمد نور، عن عدم توثيق جنازة والده ، وذلك خلال لقائه في بودكاست “كلمة السر” مع رانيا الحكيم ، حيث أكد أن وفاة والده كان في فترة تفشي فيروس كورونا.
محمد نور يتحدث عن عدم توثيق جنازة والده
وقال نور ، "أنا معرفش أنا مصورتهاش لأنه كان وقت كورونا ، وبعدين أبويا الله يرحمه كان أقرب حد ليا ، وكان آخر 6 أو 7 شهور كان تعبان جدًا وقت الكورونا ومنكنش فيه شغل ، ومكنش فيه فلوس وكنا قاعدين في البيت ، ووقت ما توفى الموضوع كان صعب جدًا بالنسبالي وأنا ماوثقتش حاجة الواحد كان في ايه ولا ايه".
وأكد محمد نور ، أنه كان يعيش في صدمة بعد وفاة والده ولم يكن مستوعبًا لخبر رحيله، حيث قال : "قعدت بتاع 15 أو 20 يوم مش مصدق ومش مستوعب ، لأن أبويا كان طيب وأطيب واحد وفي حياته عمره ما زعقلي، وأنا عيالي علي وعمر بنفخهم وبضربهم وبجري وراهم".
حديث محمد نور عن فرقة واما
كما تطرق نور للحديث عن نجاح فرقة واما، قائلًا : "واما ناجحة جدًا لحد ما جه الوقت اللي أنا بقيت أغني لوحدي وفهمي بيمثل ، وإحنا رجعنا وكنا لسه في السعودية، وعندنا تور في أمريكا وكندا".
وتابع : "نادر حمدي فضل إنه يخليه في التوزيع وكده وهو فضل التوزيع وهو أخونا وصاحبنا وعشرة عمرنا، ومحصلش أي خلاف بينا، وهو مركز في التوزيع وناجح جدًا فيه وإخوات وأصدقاء وحبايب".
بداية حب محمد نور للموسيقى
واختتم محمد نور حديثه بالكشف عن السر في حبه للموسيقى، حيث قال : "اللي كونلي شخصيتي إن بابا وماما سابوني أتعلم، واتعلمت اعتمد على نفسي، وماما كانت بتعزف قانون وبابا كونترباس، ومتعلمتش حاجة غير المزيكا ، وبابا كان موجه أول تربية موسيقية وكان بيعزف كونترباس زمان وأخويا بيعزف كامنجا وعايش برا".
أسرار في حياة محمد نور
كما سبق وتحدث نور خلال نفس اللقاء ، عن أسرار في شخصيته التي لم يعرفها أحد، وقال: "اللي بيعرفني من قريب بيشوف حاجات مختلفة خالص غير شكلي، واللي بيشوفني بيقولي أنت قد ايه طيب وبتحب الناس وكل اللي ميعرفنيش يفتكر حاجة تانية".
أيضًا كشف محمد نور عن وقت احساسه بالسلام النفسي، قائلًا: "الشغلانة بتاعتنا دي غريبة جداً كل واحد قبل مابينام يقعد يقول مين حفلة فين ومين كسب كام ومين نزل صورته اكبر من مين ومين لسه راح السعودية وانا لسه مروحتش، أنا الوحيد اللي في الشغلانة دي مليش دعوة باي حد، وأي حد بيعمل حاجة حلوة أنا أول واحد ببعتله مبروك وكل الناس اللي في جيلنا كلهم صحابي ولما تيجي سيرتنا يقولوا نور ده شيك اوي ملوش دعوة بحد".
