صحابي ماتوا.. محمد نور يكشف سبب رعبه وخوفه من الموت
حل الفنان محمد نور ضيف في بودكاست "كلمة السر مع رانيا حكيم" وتحدث أثناء اللقاء عن تفاصيل نشأته في بيت فني وانطباعه عن الأشخاص الذين يقابلهم لأول مرة.
وبدأ محمد نور حديثه عن أسرار في شخصيته التي لم يعرفها أحد، وقال: "اللي بيعرفني من قريب بيشوف حاجات مختلفة خالص غير شكلي، واللي بيشوفني بيقولي أنت قد ايه طيب وبتحب الناس وكل اللي ميعرفنيش يفتكر حاجة تانية".
السلام النفسي
وكشف محمد نور عن وقت إحساسه بالسلام النفسي، قائلًا: "الشغلانة بتاعتنا دي غريبة جداً كل واحد قبل مابينام يقعد يقول مين حفلة فين ومين كسب كام ومين نزل صورته اكبر من مين ومين لسه راح السعودية وانا لسه مروحتش، أنا الوحيد اللي في الشغلانة دي مليش دعوة باي حد، وأي حد بيعمل حاجة حلوة أنا أول واحد ببعتله مبروك وكل الناس اللي في جيلنا كلهم صحابي ولما تيجي سيرتنا يقولوا نور ده شيك اوي ملوش دعوة بحد".
وعن الأماكن التي يشعر فيها بالأمان، أوضح: "انا عندي حاجتين بحب أوي اقعد في البيت عندي لوحدي لأني بحس إن عيلتي كلها موجودة، وبحب أروح البحر بردو بحب أدخل جوا البحر في جدة بالذات المياه بتبقى سخنة وبقعد أفكر في حاجة الشغل وأنا في المياه".
وتابع محمد نور : "أنا مبعرفش أعمل أي حاجة من غير ما أكلم أمي وهي قاعدة معايا في نفس البيت في الدور اللي تحت وأنا نازل وطالع ادخلها أشوفها محتاجة حاجة ناقصة حاجة ومبقولهاش أنا مسافر كتير عشان بتتوتر ووجودها في حياتي مطمئن ومخليني أحس إني مفيش مشكلة في أي حاجة وكلمة السر عندي في دعوة أمي ليا وأي حد بيدعيلي".
وتحدث محمد نور عن الإنذارات في حياته وأسباب تخوفه، قائلًا: "مشكلتي من وأنا صغير ناس صحابي صغيرين ماتوا فالموضوع ده بيخوفني جدًا وبخاف على الناس اللي حواليا والتجارب دي سابت لي أثر مرعب وموضوع الموتوسيكل بالذات دي أكتر حاجة فيها إنذار، والإنذار بقى مرتبط بالموت".
وعن تعامله مع الأشخاص لأول مرة وانطباعه عنهم، أوضح: "أنا أي حد بشوفه لأول مرة يا إما أحبه يا إما محبهوش مباخدش وقت، فالانطباع الأولاني يا إما ظريف يا إما دمه تقيل".
