بعد سرقة منزلها.. نهاد أبو القمصان: "لو مش عارفين تسرقوا بلاش توقّفوا سوقنا"
علّقت نهاد أبو القمصان، المحامية الحقوقية ورئيس المركز المصري لحقوق المرأة، على واقعة محاولة سرقة فيلتها بالساحل الشمالي، بأسلوب هجومي ساخر، منتقدة ما وصفته بـ"عدم الاحترافية" لدى اللصوص هذه الأيام.
وقالت نهاد في فيديو لها - نشرته عبر حسابها الرسمي على موقع تبادل الصور والفيديوهات "إنستجرام" - : "عندي سؤال هي الحمورية وقلة الكفاءة وصلت حتى للسادة الحرامية؟.. هو التعليم باظ للدرجاتي! يعني حتى السادة الحرامية ميبقاش عندهم استراتيجية في العمل أقولكم الحكاية اتصل بيا الجنايني بتاع فيلتي في الساحل قاللي هو حضرتك سايبة بابا التارس مفتوح؟ قلتله لا يا حبيبي احنا خلصنا الإجازة وقفلنا وتمام قاللي لا أصل باب التراس مفتوح فيبدو أن حد فتح والشيش مفتوح والإزاز مكسور والسلك مقطوع.. وصورلي الفيلا بالفيديو البوفيه الأدراج مفتوحة والدواليب مفتوحة قلتله بص على التلفزيون ومكنة القهوة متسرقوش، الحرامي الحمار كان متخيل إن الناس بتسيب أشياء ثمينة واضح إننا عاوزين نعمل دورة تدريبية للسادة الحرامية لأن كفاءتهم قلت جدا مبقاش عندهم استراتيجية في السرقة مش عارفين يسرقوا مين".
نهاد أبو القمصان تقترح تدريب اللصوص لرفع مستوى السرقة
وأضافت ساخرة: "مش كل الناس عندهم جامعة خاصة ولا حاطين ذهب وياقوت ومرجان وإسترليني ودولار في الفلل طالما الناس لسه بتدفع أقساط الجامعات وأقساط المدارس تعرف إنهم على الله الشفا.. نفس أشوف التنظيم العصابي ده لأن التعليم باظ دول لو عندهم تعليم كانوا حطوا استراتيجية أحسن من كده.. الساحل يا ابني مبيتسرقش فيه احنا ناس غلابة عندنا حساب المكتب في البنك يجي الموكلين يحطوا الفلوس في الحساب والضرائب تاخد نصهم ومرتبات المحامين ياخدوا الباقي وبحمد ربنا لو لقيت اتبقالي أشرب قهوة".
وفي نهاية الفيديو، وجّهت نهاد أبو القمصان شكرًا طريفًا لقسم شرطة مارينا، وعلّقت: "حاجة هزلية والله العظيم بدل ما نعزم الناس يجو ياكلو فطير معانا على البحر نتصل بيهم نقولهم فيه سرقة واشتباه سرقة أعتقد إن فيه فيلا أو اتنين اتسرقوا.. الخطورة بقى إن حرامي يدخل ويبقى شخص موجود في البيت ده أخطر ما في الموضوع، الحرامي بيبقى عامل زي الفأر مرعوب ومذعور ولو شاف حد في وشه ممكن يرتكب حماقات وجرائم لمجرد إنه اتخض، فالموضوع لازم يتاخد بجدية وبقترح عمل كورسات تدريبيبة لتعليم السادة الحرامية السرقة علشان يتقفشوا بحاجة عليها القيمة فيجو لينا نترافع، انما كده هيوقفوا سوقنا احنا كمان إذا كان هما خايبين في السرقة هنترافع احنا على مين؟!".
