امتحانات الثانوية العامة 2025..10نصائح لازم تعرفها..أخصائية نفسية لـ"نيوزرووم"
قبل أيام قليلة من انطلاق امتحانات الثانوية العامة 2025، يعيش آلاف الطلاب حالة من التوتر والضغط النفسي في هذا التقرير من "نيوز رووم"، لا نقدم نصائح تقليدية، بل نشاركك بكلمات داعمة من القلب، ورسائل تشجيعية، وتصريح خاص من سارة رأفت، أخصائية الصحة النفسية والعلاقات الأسرية، حول كيفية التعامل مع الضغوط النفسية في هذه المرحلة الحساسة.
1. مش لازم تكون بطل خارق.. كفاية إنك بتحاول
الخوف مش ضعف، والتوتر مش علامة فشل، طبيعي تحس بقلق قبل امتحانات الثانوية العامة 2025، وده مش معناه إنك مش جاهز، الأهم إنك تكمل، حتى لو خايف.
كما أكدت سارة رأفت: "الطالب مش آلة، ولازم نطمن ولادنا إن التوتر قبل الامتحان طبيعي جدًا، المهم نساعدهم يحسّوا إنهم مش لوحدهم، وإن المحاولة في حد ذاتها بطولة."
2. نتيجتك مش مقياس لقيمتك
وعلقت أخصائية الصحة النفسية ورقة الامتحان مش هتكتب مستقبلك بالكامل، فيه ناس مجابتش مجموع كبير ونجحت في حياتها، والعكس صحيح، قيمتك مش رقم، قيمتك إنك إنسان بيجتهد وبيكمل.
3. واجه الامتحان بإحساس الناضج مش الضحية
وتابعت رأفت ممكن ما تكونش اخترت نظام التعليم، لكن تقدر تختار طريقتك في التعامل معاه، ذاكر علشان نفسك، علشان تحس بالرضا إنك عملت اللي عليك، مش علشان ترضي أي حد تاني.
4. خد نفس.. مش مجازًا
كل ساعة، اقفل الكتاب دقيقة وامشي شوية وخد نفس عميق، المخ محتاج أكسچين، وراحتك النفسية جزء من تركيزك.
5. ركّز في خطوة واحدة بس
متحاولش تذاكر كل المواد في نفس اللحظة، ركّز على المادة الجاية فقط، كل حاجة بتيجي في وقتها، خطوة بخطوة.
6. ادعي على طريقتك
قول لربنا اللي في قلبك من غير تكلّف: "ساعدني أعدي"، "طمني وأنا قلقان"، "ثبتني وأنا ضعيف"، هو سامعك وبيفهمك حتى من غير كلمات مرتبة.
7. خلي حواليك ناس بتطمنك
ابعد عن المقارنات والجروبات اللي بتزود التوتر، اليومين دول محتاجين هدوء، وحد بسيط يقولك: "أنا مصدق فيك".
8. اكتب خوفك وارميه
هات ورقة واكتب كل الحاجات اللي مخوفاك: "هفشل، هنسى، مش هعرف أجاوب"، وبعدها امسك الورقة وقطّعها، هتحس إن الخوف خرج من دماغك.
9. شجّع نفسك بنفسك
مفيش حد هيحس بتعبك غيرك، شجّع نفسك على كل خطوة بتاخدها، حتى لو صغيرة. الساعة اللي ذاكرت فيها وإنت تعبان تستحق تصفيق.
10. امتحن.. بس عيش
كل كويس، نام حتى لو ساعتين، اسمع أغنيتك المفضلة، اضحك، مفيش مانع إنك تعيش وانت بتكافح، الامتحانات جزء من الحياة، مش الحياة كلها.
رسالة لكل طالب بيستعد لامتحانات الثانوية العامة 2025:
“ نصيحة سارة رأفت أخصائية الصحة النفسية والعلاقات الأسرية الأخيرة لكل طالب هي ”ربنا شايف تعبك ومش هيضيعه"، حتى لو النتيجة مجتش زي ما كنت عايز، صدق إنك ماشي في طريق هيكافئك في الوقت المناسب، حتى لو اللفة طويلة شوية.
