شاهد .. التصريحات الكاملة لـ زيزو للكشف عن كواليس انتقاله من الزمالك للأهلي
في أول تصريحاته بعد انتقاله رسميًا إلى النادي الأهلي، عبر أحمد مصطفى سيد “زيزو” عن موقفه من خطوة الرحيل عن القلعة البيضاء، مؤكدًا أنه لم يكن يومًا يسعى للرحيل عن نادي الزمالك في وقت سابق، وأن قرار رحيله جاء بعد دراسة وتفكير عميقين، خاصة في ظل تغير الظروف داخل ميت عقبة.
وجاءت تصريحات احمد سيد زيزو في برنامج قهوة فايق كالتالي :
** ما حدث لي في الزمالك كان مخططا له منذ عدة أشهر"
** في جلسة مع مجلس إدارة الزمالك قيل لي: اخرج وقل إنك أنت من ترغب في الرحيل"
** في شهر أغسطس 2024 جالي عرض رسمي من نادي نيوم السعودي بـ 6.5 مليون دولار، وقتها مجلس إدارة الزمالك وافق وجمعتني جلسة معاهم، واللي وقف الموضوع وقتها إنهم قالولي اطلع قول للناس انك عايز تمشي عشان خايفين من الجمهور لأن كل قراراتهم مبنية على السوشيال ميديا قلتلهم مش هطلع أقول حاجة ده عرض عندك عايز توافق وافق مش عايز متوافقش براحتك
** مشاكلي مع الزمالك بدأت في آخر عام ونصف، ورفضت استغلال الشرط الجزائي في عقدي"
** اتحجز لي تذكرة كشف طبي في الإمارات لعرض من نادي نيوم، وأنا مكنتش عارف أي حاجة عن الموضوع واتفاجئت بيه، ومش عارف هل النادي وافق عليه ولا لأ.
** روحت النادي أنا ووالدي، وخدت ميعاد مع كابتن حسين لبيب، وفجأة قال إنه تعبان ومش هييجي النادي، وبعتلنا حسام المندوه بداله.
** كلمته وقولت له:" جالي تذكرة حجز للكشف الطبي في الإمارات لعرض من نادي نيوم.' رد قالي: 'إيه دا؟ عرض إيه اللي بتتكلم عليه؟' قلتله: 'أومال التذكرة دي وصلتلي إزاي؟!
** أبويا اتشتم 8 أشهر ورفضت أرد على الإساءة، وراهنت على جمهور الزمالك إنه ميصدقش اللي بيتقال عليه ولكن كله بيكدب الكدبة ويصدقها
**أنا نفس الشخص اللي كان عقده فيه شرط جزائي، ومع ذلك رفضت أمشي. ولو كانت نيّتي في يوم من الأيام إني أسيب النادي، كنت عملت ده من بدري. نادي الريان القطري طلبني من سنين، وساعتها رفضت استغلال الشرط الجزائي في عقدي والرحيل واتمسكت بالاستمرار لنهاية عقدي
**من شهر يناير 2024 بدأت الأحداث. خلال الـ6 سنين اللي قضيتها في الزمالك، عمري ما عملت مشكلة مع حد، وكنت دايمًا بشتغل بإخلاص وفي صمت، ومحدش كان بيسمع عني غير في الملعب، لحد ما جه شهر يناير، وبدأ الموضوع يكبر وبدأت المشاكل. في يناير 2024 جالي عقد وإحنا في إفريقيا، وجالي عرض كبير من نادي الشباب السعودي بقيمة 6 ملايين دولار واترفض
** والله العظيم ما طلبت 100 مليون من الزمالك وقت التجديد وطلعوا وقتها في كل حتة يقولوا ده طالب 100 مليون وواحد من اعضاء مجلس الإدارة اللي المفروض يحافظ على السرية طلع على الهوا يقول زيزو طالب أكتر من 60 مليون بكتير رغم أن المفروض كان فيه جلسة تانية متحدد موعدها، هل طبيعي ده يحصل؟ الكلام كان حاجة ويقولوا زيزو اسطورة لكن الفعل كان حاجة تانية
** لما جددت مع الزمالك في كل مرة، ما حصلش من والدي أنه طلب أي فلوس من النادي. اسألوا المستشار مرتضى منصور، هل في مرة من مرات التجديد كان بيطلب فلوس؟ إزاي تطلعوا والدي بالصورة دي؟ أبويا عنده 60 سنة، وفضل 60 سنة يبني اسمه وصورته قدام الناس. إزاي تطلعه بيسمر ويعمل صفقات من ورا ابنه ممكن تدوني سبب واحد يخليكم تطلعوني وأبويا مادي؟ وأبويا يبقى مستباح من واحد صاحي من النوم مش عارف بيعمل إيه، يطلع يكتب تويتات عليه (ممدوح عباس)
**أعضاء مجلس إدارة الزمالك شغلوا لجان الكترونية عليا وقت التجديد وعملوا حملات وهما عارفين إنك كلاعب مش هتقدر ترد ولا تواجه اللي بيحصل ده وطلعوا قالوا إني طالب أرقام للتجديد والله العظيم ما طلبتها
** جيل الزمالك المميز سنة 2019، لما كل واحد فيهم جاله فرصة يمشي مشي، وانت دلوقتي بتنده عليهم يرجعوا تاني مع إنهم سابوك وكل واحد راح نادي، وانت عاوز ترجعهم تاني وما حدش منهم عايز يرجع
** جيرارد لما كان بيدرب فريق الاتفاق، تواصل معايا بشكل مباشر وقال لي إنه سأل محمد صلاح عني. عرض الاتفاق كان 2.5 مليون دولار، وكان عرض جيد للزمالك لأنه جه قبل 6 شهور من نهاية عقدي. الراجل المفوض من نادي الاتفاق علشان ييجي يتفق، جه ومحدش من الزمالك رضي يقابله
** إنت بتقولي ده أبوه طالب فلوس ومش من حقه؟ خلاص يا عم، هجيبلك وكيل من بره وأقعد أبويا في البيت. أنا كنت شايف إن ده حقه يطلب في المراحل الأخيرة من المفاوضات، وده شيء كل الناس بتعمله، وحصل في الزمالك عشرين ألف مرة، وما طلبش حاجة غريبة.
** مفيش حاجة مستقرة في نادي الزمالك غير الجمهور واستمريت السنين اللي فاتت عشانهم
** الانضمام للأهلي مكنش قرار سهل، بس في الآخر اكتشفت إن مفيش حاجة باقية. أنا اتهنت لمدة سنة كاملة من نادي الزمالك، والـ 5 سنين اللي قضيتهم في النادي وكأني ما عملتش فيهم أي حاجة
** جمهور الأهلي أنا بحترمه جدًا، وقلت أكتر من مرة إن في ناس قرايبي ومن عيلتي أهلاوية، وده كان من أكبر الأسباب اللي خلّتني أخد خطوة زي دي. الموضوع مش موضوع فلوس، الموضوع إنك شايف نادي كبير بيلعب في بطولات كتير، وعايز تبني معاهم حلم جديد وتاريخ جديد. وده أنسب نادي تعمل فيه كده.
وتضمن الجزء الثاني من الحلقة الآتي
** لجنة التخطيط .. الناس الجديدة اللي كانت جاية تمسك الكورة في الزمالك كانوا فاكرين الموضوع فلوس ، طيب خلاص بص هنزودلك ومش هنزودلك ، قلتلهم والله العظيم الموضوع ما مادي والله ما موضوع فلوس
**انا عايز حقي وحق والدي في اللي حصلنا اخر فترة ، قلتلهم في ناس كتير قالت علينا حاجات مش حقيقية وعايزنهم يعتذروا ويقولو والله كنا بنكذب ، انت بقالك سنة بتهيني ومش عايز تنزل إعتذار ، عايز شكلك يفضل حلو وشكلي انا يكون وحش
** كان في اندية بتلعب في كأس العالم كلموني ، فا انا روحت طلعت فيزا امريكا تحسبًا لأي حاجة ، وعلى فكرة لو مروحتش لعبت مع نادي في كأس العالم ، كنت هروح اتفرج على ماتشات في كأس العالم في امريكا
** مفيش حد من عمال النادي هينزل صورتي ويدوس عليها من غير اوردر من مجلس الإدارة ، ولو تصرف فردي زي ما بتقول مطلعتش ليه بيان اعتذار وسيبت الموضوع يعدي كدة
** انت هتعمل بطولات وانجازات وتعمل تاريخ وعندك جمهور مرعب ، فا تعمل دا فين غير النادي الاهلي
** الاهلي فريق كبير وشرف لأي حد يكون موجود فيه ، انا مبسوط متحمس اني احضر التمرين وألعب ماتشات مستني اليوم دا ، وكمان مبسوط بجمهور الاهلي وفرحته وحماسه
** الخطيب قالي خليك زي منت وتشرفت بمكالمته وكنت مبسوط أوي ومش قلقان من المنافسة على مركزي في الأهلي والمنافسة حاجة صحية
** مش عاوز اصنف نفسي صفقة القرن أو انتقال عادي مش انتقال عادي مش عاوز اسميها عازز الناس تشوفني وردي في الملعب وامام عاشور صفقة القرن وانتقالي للأهلي مش عادي بس هسيب الحكم للجماهير
** نفسي أكسب دوري أبطال افريقيا عشان مكسبتهاش مع الزمالك وأشارك في كأس العالم للأندية عشان مشاركتش فيها مع الزمالك ، انا رايح الأهلي اصلًا عشان اكسب كل البطولات
** عرض الأهلي كان أقل من عرض الزمالك بكتير ، لكن الموضوع بالنسبالي مكنش فلوس بس. انا كنت عايز احقق انجازات وبطولات واعمل تاريخ وكمان انت عندك جمهور مرعب بجد وده مكنش هيتحقق في نادي تاني غير الأهلي
** لن احتفل أمام الزمالك إذا سجلت في مباراة القمة وإمام عاشور أفضل لاعب في مصر
