المخرج خالد جلال ينعي الراحلة سميحة أيوب بـ رسالة مؤثرة
كتب المخرج خالد جلال علي صفحته الرسمية علي موقع التواصل الإجتماعي “ فيس بوك ” رسالة لسميحة أيوب تحت عنوان " وهي يعني أم كلثوم ماتت؟" في تعبير منه عن الحزن العميق الذي يشعر به بعد وفاتها.
وجاء في رسالة خالد جلال:
"أمي حبيبتي .. بعد التحية و السلام
لأول مرة ما الاقيش كلمات تعبر عن مشاعر الفقد اللي حسيت بيها النهارده .. جايز علشان صعب أصدق بعد طول الوقت معاكي إن البطلة مش هتظهر مرة تانية.. وجايز لأن الحياة الحقيقية مش زي الفيلم اللي ممكن نشوفه كل يوم و البطلة تظهر في نفس الثانية و نستمتع بإبداعها .. آخر مرة تمثيل كانت في عيد الشرطة اللي قبل اللي فات و كنتي تعبانة قبلها و أصريت إنك تيجي و وافقتي وكنتي زي البدر علي الشاشة و علي المسرح وجه الحصاد الريس كلمك و كلمتيه و طلع علي المسرح و حياكي و قبل جبينك".
وأضاف : من تسع سنين كنا ف المغرب و سمعتك بتتكلمي مع القديرة الراحلة ثريا جبران و قلت لك الكلام ده لازم نحتفظ بيه ده ميراث و قلتي تعالي نعمل كده و عملنا سميحة أيوب تروي لخالد جلال سنة ٢٠١٦ وسام عظيم بأفخر بيه لحد النهارده إنك بتحكيلي أنا و الناس بتسمع حكاياتك".
لقاء خالد بسميحة أيوب
وتابع خالد جلال في رسالته "في كل رحلة و كل مكان كنتي موجودة وجودك سند و حماية و أمان و حنان و حب و طيبة و قوة كل كلمة كنتي بتقوليها خبرة عمر و درس عميق حتي وإنتي بتهزري .. فكرتك أول مرة شفتيني سنة ١٩٩٦ في روما مع العظيم الراحل سعد الدين وهبة و كنتوا راجعين من المانيا و زرتونا في الأكاديمية المصرية بروما و دخلتي بروفة مسرحيتي و سمعتيني وأنا باخرج و قلتي لازم نشوفك لما ترجع مصر و ارجع بسرعة
ولما طلبت صوتك يحكي حكاية دفعة بعد الليل ف حفل تخرجهم و حكيتي فبقت حفلتهم بقيمة الصوت و الضوء من جمال صوتك
لما طلبت منك تظهري علي شاشة افتتاح مهرجان المسرح العربي بالقاهرة و قلتي لضيوف مصر من كل الوطن العربي ( أهلا بيكم في مصر مهد المسرح العربي ) إيه ده يا أمي هرم بيتكلم ؟".
لقب سيدة المسرح
وأكمل خالد جلال في رسالته "فاكرة الرئيس حافظ الأسد لما سماكي سيدة المسرح العربي ؟ طب فاكرة الرئيس انور السادات و هو بيقول للرئيس جيسكار ديستان مدام سميحة توچووور كومبليه .. طب فاكرة وقفتك مع الست أمينة رزق في فرنسا وانتوا بتعملوا فيدرا
طب فاكرة وانتي ماسكة المسرح الحديث لما ابتدت حرب اكتوبر وخليتي العبقري محمد نوح و كل الفرقة يعملوا مدد مدد شدي حيلك يا بلد.
طيب فاكرة التمثال اللي عملهولك عصام درويش كنتي فرحانة بيه قد ايه؟"
وتابع:"أمي الحبيبة.. كلامي ملخبط مش كده ؟ … معلش ما هو ألف حكاية و حكاية معاكي برضه مش سهل ترتيبها في كلمتين هنا
كنت دايما في لحظات الوداع اللي زي دي باكتب بالفصحي واقول ( الحزن عميق ) و لأول مرة اكتشف إني ممكن أحزن أكتر من الجملة دي … ودايما كنت أقول للي رحل ادعيلنا بس معاكي بقولك اتطمني أنا هفضل أدعيلك ليل و نهار متخافيش وأخيرا اللي زيك يفضل عايش في القلوب و الأرواح و مرفرف حوالينا علي طول.. وأخيرا يا سوسو الجميلة هزعل ليه ؟ وهي يعني أم كلثوم ماتت؟ ماهي عايشة لحد النهارده .. تصبحي علي خير .. بحبك .. ابنك خالد جلال".
وفاة سميحة أيوب
يُذكر أن الفنانة سميحة أيوب، التي تُعد من أعظم الفنانات في تاريخ المسرح المصري والعربي، قد رحلت عن عالمنا بعد مسيرة حافلة بالعطاء والإبداع. وبرحيلها فقد الفن العربي أحد رموزه البارزة التي أثرت في المسرح والدراما.
