"رمز الفرح في كل بيت".. رانيا فريد شوقي تهنئ الزعيم بذكري ميلاده

هنأت الفنانة رانيا فريد شوقي، الفنان عادل إمام بمناسبة عيد ميلاده. ونشرت صوره له عبر حسابها الشخصي بموقع التواصل الاجتماعي "إنستجرام". 

تهنئة الزعيم

وكتبت رانيا فريد شوقي: "يا زعيم، كل سنة وأنت البسمة اللي طمنت قلوبنا، والصوت اللي حكى حكايات الناس البسيطة بعبقرية"
وتابعت: "كل سنة وأنت بتكبر في عيوننا، مش بس كفنان، لكن كرمز زرع الفرح جوه كل بيت، عيد ميلادك مش بس عيد ليك، ده عيد للفن، للناس، للذكريات الحلوة و الضحكة اللي من القلب اللي بتهون كتير من مشاكلنا، كل سنة وأنت بخير، وقلوبنا دايمًا داعية لك بالصحة وطول العمر".

دعم بوسي شلبي

وفي سياق اخر، دافعت الفنانة رانيا فريد شوقي عن الإعلامية بوسي شلبي، بعد بيان أسرة الفنان الراحل محمود عبد العزيز والذي اتهمت فيه الإعلامية بما وصفته ادعاءات كاذبة بشأن أنها كانت على ذمته قبل الوفاة وأن المأذون قد قام بتزوير إشهاد طلاقها.

 طمس الحقائق 

وكتبت رانيا فريد شوقي عبر صفحتها الرسمية بموقع فيسبوك": "في حاجات صعب تتقال، بس الأصعب إننا نسكت عنها.. لما تكون ست محترمة، عاشرت راجل بكل إخلاص لأكتر من 20 سنة في النور، والناس كلها كانت شاهدة، وفجأة يتقال إنها ما كانتش زوجته!، ده مش بس ظلم، ده طمس للحق، وتجريح في سيدة كانت زوجة بكل معنى الكلمة، في العِشرة، في الستر، في الوفاء".

عون وسند

وأضافت متسائلة: "إزاي ننسى وقفتها جنبه في أضعف لحظاته؟، في مرضه وكانت معاه في المستشفى مقيمة وبترعاه بكل الحب والمودة والخوف عليه، كانت السند، والونس، والحياة اللي عاشها باختياره، مش غصب عنه".

علاقة في العلن

وتابعت رانيا فريد شوقي: "المؤلم أكتر إن اللي بيحصل دلوقتي ضد رغبته هو، الراجل اللي عاش معاها ومكانش يوم اعترض أو أنكرها. فلو كانت فعلاً مش زوجته، ليه عاش معاها قدام الكل؟. وليه سكتوا كل السنين دي؟. ليه الكلام بدأ بس بعد ما رحل؟. هل الإنصاف بيتأجل لحد ما صاحبه ما يقدرش يدافع عن نفسه؟.. واللي مؤلم بجد، إن في الكلام ده إساءة لجميع الأطراف".

وأكملت: "اللي بيحصل مش مجرد خلاف، ده جرح في ضمير كل حد بيعرف الحقيقة وبيداريها. كل الدعم لصاحبتي، الست الأصيلة اللي عاشت في النور، واتبنت حياة على الاحترام، واللي بتدفع النهاردة تمن وفائها".