محمد خميس لـ«نيوز رووم» عن عادل إمام : "مبهج في اللوكيشن وبيدينا ثقة كبيرة"
تحدث الفنان محمد خميس عن كواليس علاقته بالفنان عادل إمام في تصريحات خاصة لموقع «نيوز رووم»، وذلك بالتزامن مع ذكرى ميلاد الزعيم عادل إمام.
كواليس مسلسل العراف
حيث روى محمد خميس بداية معرفته بالزعيم عادل إمام أثناء تصوير مسلسل العراف، حيث قال: "اشتغلت معاه في مسلسل العراف وكنت لسه في بدايتي .. كان مبهج في اللوكيشن .. كان علطول مبيبطلش هزار معانا كشباب .. كان بيدينا ثقة كبيرة في نفسنا .. وبيقدر كل حاجة في اللوكيشن".
موقف طريف
وروى الفنان محمد خميس موقف طريف بينه وبين عادل إمام قبل تصوير مسلسل العراف بعام، حيث قال: "كان فريق مسرحنا واخد جائزة افضل عمل جماعي في مهرجان القاهرة الدولي للمسرح التدريبي .. كنا مبسوطين بنفسنا .. وواحد صديقنا اسمه آسر عبد الوهاب قالنا أن حد من صحابه قريب عادل إمام وقاله عدوا عالمسرح سيبوا بياناتكم وصوركم جايز يكلموكم .. وجربنا وخدنا التليفون وكلمته رد عليا .. الصوت اللي سمعته هو عادل إمام فعلا .. وقالي أنا مستنيكم تعالوا واداني عنوان البيت عنده .. وانا عمال افكر هو اللي بيتقالي ده بجد .. كلمت صحابي "عبير علي، آسر عبد الوهاب، أحمد عسكر" واتحركنا وواحنا في الطريق خوفت اكون بوصف العنوان غلط فكلمته .. رد تاني وطبعًا هما اول ما سمعوا صوته تنحوا ده عادل إمام بجد .. وروحنا للاستاذ عادل إمام في فيلته والبواب كان مستنينا .. وقابلنا إيمانويل الخادم المساعد في البيت .. وقعدنا ساعتين نهزر معاه ونتكلم ومشينا .. بعدها كلمت نفس الرقم تاني رد واحد قالي الرقم غلط .. فحكيتله الموقف ده وقت العراف .. وفاجئني أنه مش فاكر أي حاجة من كل ده".
محمد خميس يتمنى عودة عادل إمام
وتمنى الفنان محمد خميس كل الصحة والسعادة للزعيم عادل إمام، وتمنى أن يعود لنا الفنان عادل إمام بأعمال جديدة تمتعنا كما أمتعنا من قبل.
حب العالم العربي للفنان عادل إمام
وروى الفنان محمد خميس موقف يؤكد مدى حب العالم العربي للفنان عادل إمام، حيث قال: "كان في عرض مسرحي في مهرجان في العراق .. الناس هناك بتتكلم العربي مكسر كأنه لغة تانية .. وأول ما عرفوا أننا مصريين بدأوا يقولوا إفيهات من مسرحيات الزعيم .. أكتر اتنين مشهورين هناك أم كلثوم وعادل إمام".
إعادة إخراج أفلام عادل إمام ظلم لأنفسهم
وأوضح الفنان محمد خميس أن فيلم شمس الزناتي لا يُعاد إخراجه كما قيل بل ما يحدث هو أن الفيلم يدور حول حياة شمس الزناتي في الجيش، وأعرب خميس عن استيائه من إعادة إخراج فيلم البحث عن فضيحة، وفيلم عصابة حمادة وتوتو، لأنه يرى أن من المستحيل إخراجهم بشكل أفضل مما كان، ومن وجهة نظره أنهم يضعوا نفسهم في معارك خاسرة.
