في "روقان".. عصام صاصا يكشف كواليس دعمه من مصطفى كامل

في ظهور صريح وجريء ضمن حلقات "بودكاست" "روقان" مع الإعلامي فتحي مصطفى كامل فتح مطرب المهرجانات عصام صاصا، قلبه وتحدث عن تفاصيل لم يعرفها جمهوره من قبل، سواء عن أحلامه القديمة، أو عن كواليس دعمه من نقيب الموسيقيين مصطفى كامل، والذي أثنى عليه بشدة، واعتبره أحد أبرز من وقفوا في صفه وصف مطربي المهرجانات في وقتٍ صعب.

الحلم الأول

بدأ "صاصا" الحديث عن حلمه الأول قبل دخول مجال الغناء، قائلاً: "أنا لو مكنتش بقيت مغني، كان نفسي أكون لاعب كرة قدم. الكورة كانت بالنسبة لي حب كبير، وكنت بلعب دايمًا في الشارع ومع صحابي في النوادي الصغيرة. بس القدر خدني في اتجاه تاني، وبدأت أكتب وأغني، وقلت لنفسي أجرب، والحمد لله اللي عملته وصوتي وصل للناس." وأكد أن حب الجمهور له هو أكبر دافع لاستمراره وتطوير نفسه فنيًا.

دعم نقابي 

أما عن علاقته بنقابة المهن الموسيقية؛ أشاد "صاصا" بالفنان مصطفى كامل، والدور الذي لعبه بعد توليه منصب النقيب، قائلاً: "أنا مكنتش بشوف غير مصطفى كامل من ساعة ما مسك النقابة، بقيت أشوفه في كل موقف، وواقف جمبي بشكل مش طبيعي. راجل ابن بلد، وبيحب يساعد، واشتغل على نفسه وعلى النقابة عشان الناس ترجع تشتغل وتاكل عيش."

وأضاف "صاصا": "كان في فترة الناس فيها كتير اتحرمت من شغلها، خصوصًا مننا إحنا مطربين المهرجانات. لكن مصطفى كامل عمل المستحيل، وفتح باب النقاش والتفاهم، ورجعنا تاني نشتغل بعد ما كان رزقنا مقفول. وده ميحصلش غير من راجل فاهم يعني إيه لقمة العيش وبيحترم الفن بكل أشكاله."

دور مصطفي كامل 

وأكد "صاصا" أن مصطفى كامل لم يكتفِ بالدعم المعنوي، بل خاض معارك حقيقية للدفاع عن حقوق عدد كبير من الفنانين الذين كان يتم تجاهلهم، متابعًا: "الراجل كان ممكن يريح دماغه، بس هو اختار يقف في ضهرنا. ناس كتير ماقدرتش ده، بس إحنا عارفين قيمته كويس."

الحلقة لاقت تفاعلًا كبيرًا عبر مواقع التواصل الاجتماعي، واعتبرها كثير من المتابعين واحدة من أصدق الحوارات التي ظهر فيها "صاصا"، حيث بدت كلماته نابعة من القلب، بعيدة عن التجميل أو التصنع.