يارا السكري : بدأت المشوار في مجال الأزياء .. ودخلت التمثيل بالصدفة
حلّت مجموعة من نجوم الدراما الجدد، وأهم الوجوه الصاعدة، ضيوفًا على برنامج "صاحبة السعادة" المذاع على قناة "dmc" تقديم الفنانة والإعلامية إسعاد يونس؛ حيث تحدثت خلال الفقرة الأولى الفنانة يارا السكري، والتي تحدثت عن حياتها وعن دورها في مسلسل "فهد البطل"، قائلة: "أنا من الإسكندرية، اتولدت وكبرت في السعودية ورجعت عيشت في مصر بعد كده، وما يتم تداوله إنى من بورسعيد خطأ".
بداية المشوار الفني
وأضافت الفنانة يارا السكري: "بدأت المشوار في مجال الأزياء وبعد كده الإعلانات ودخلت التمثيل بالصدفة، وكان بيتعرض عليا وقتها ولكن كنت قافلة سكته ومش في بالي، ولكن بعد الإعلان جاتلي عروض مغرية جدًا، واخترت أكتر عرض اللى الناس بتدور عليه، فاخترت دور ملهوش علاقة بالشكل".
وأضافت يارا السكري: "المخرج حكالى الدور ولما قرأته خفت وقلقت وفكرت أعتذر، وقلت مش هقدر لأن تفاصيله كتير وبتحمل وبتضرب وتسقط وكانت هتدمن، وقالولى خدي وقتك وفكري تاني وإحنا مستنيينك، وعملت كده ولما تقمصت الشخصية حبيتها أوي، حتى لما كنت بتفرج كنت بقول مين دي ومكنتش عارفة إزاي بعيط بالحرقة دي".
التعاون مع حمزة العيلي ومحمود البزاوى
وبشأن تعاونها مع حمزة العيلي ومحمود البزاوى قالت يارا السكري: "حمزة حامى أوي، عندي مشهد في المستشفى وهو داخل يخنقني أنا كنت خايفة منه، واندمج وبيضرب السرير، من كتر ما هو متحمس إيده اتعورت، بس هو إنسان جميل، وكنت مستمتعة معاه ومحمود البزاوى كنت حاسة إنه والدي".
وعن أحمد العوضي قالت يارا السكري: "العوضي إيده تقيلة شوية، كان هيخلعلى كتفي، وإحنا في مشهد اكتشاف الحمل وهو بيشدنى جامد، مع الإعادة مكنتش عارفة أحرك دراعي، وقعدت أسبوعين اتعالج علاج طبيعى".
وعن الشائعات قالت يارا السكري: "اتقال إن أنا والعوضي هنتجوز عشان هو قال هايتجوز بعد رمضان فقالوا أنا العروسة، يمكن عشان أنا وجه جديد بس، والمشاهد اللى بينا ركبوها في فيديوهات بأغاني رومانسية وخلوها إنى أنا العروسة".
واختتمت حديثها: "أنا حاليًا بصور فيلم صقر وكناريا مع محمد إمام، وهو دور مختلف في كل حاجة من ناحية اللوك والشكل والاستايل، وهى بنت مصممة أزياء، والفيلم أكشن كوميدي".
