محمد فؤاد : طول عمري بدفع للسينما وغيابي مش بسبب الأجر وراجع بفيلمين |خاص
تحدث الفنان محمد فؤاد عن عمله في السينما منذ البداية وسبب غيابه عن الشاشة الكبيرة لسنوات طويلة، كما استرجع ذكرياته مع السيناريست مدحت العدل وتقديمه معه فيلم أمريكا شيكا بيكا.
وقال محمد فؤاد في لقائه مع موقع نيوز رووم : "مدحت العدل هو اللي اكتشفني سينمائيًا، وجازف وآمن بي في فيلم أمريكا شيكا بيكا، وقدمني للأستاذ الكبير خيري بشارة، واتعلمت منهم يعني إيه سينما، وأي كلام يطلع من مدحت بعتبره شهادة تتويج أو تاج على راس محمد فؤاد".
وتابع فؤاد : "راجع للسينما تاني، واللي كان معطلني مش الفلوس ولا الأجر، لأني طول عمري بدفع للسينما، وفيلمي إشارة مرور وإسماعيلية رايح ماخدش فيهم فلوس".
وأكمل : "أول مرة خدت فلوس من السينما كان في فيلم هو في إيه ؟ مع المنتجة إسعاد يونس، وقبل كده كنت بناخد فلوس ولكن بصرفها على الفيلم".
واختتم محمد فؤاد بالكشف عن مشاريعه المقبلة، حيث قال : "بحضر لأغاني جديدة وفيلمين جديدين منهم فيلم قلبي في نيويورك".
وكان قد كشف فؤش بالأمس مفاجأة، خلال العرض الخاص لفيلمه أمريكا شيكا بيكا، ضمن فعاليات الدورة الـ 47 من مهرجان القاهرة السينمائي الدولي.
وأكد محمد فؤاد تفكيره في الاعتزال، حيث قال : "ممكن أعتزل دلوقتي وأنا مكتفي بهذا القدر، وبحمد ربنا على مشواري".

