شيماء سيف عن اعتذار أيتن عامر: "كنت شايفاها بتقلب الترابيزة" |فيديو
خرجت الفنانة شيماء سيف عن صمتها لتكشف عن السبب وراء تعليقها على اعتذار الفنانة أيتن عامر لها، بعد كشفها أن أيتن عامر كانت الشخصية التي أحرجتها بسبب وزنها الزائد.
وعلقت شيماء سيف قائلة: “ اللي خلاني أرد بالطريقة دي على أيتن عامر، إن أنا ماكنتش شايفة إن أيتن بتعتذر، أنا كنت شايفة قلب ترابيزة وفيه كلام كتير أوي اتقال كدب، بدليل إنها بتقول هي افتكرت من 6 سنين لما كنا بنتكلم على موضوع التخسيس، طيب أنا من 6 سنين عمري في حياتي ما كنت أتخيل إني أعمل تكميم ولا حتى أخس، وفكرة التكميم دي اتاخدت في أسبوع بعد مشكلة رجلي ولما مي كساب قالتلي على التكميم خدت القرار على طول.”
تفاصيل أزمة شيماء سيف وأيتن عامر
واكملت شيماء سيف حديثها قائلة: “اللي حصل إننا كنا قاعدين كلنا في المطار ومسافرين وكنا قاعدين وفيه ناس وهي جت وبدأت تكلمني وتقول شيماء إنتي إيه موضوع الخلفة قلتلها لسة ربنا ما كرمش، فقالتلي تسمعي مني يا شيماء إنتي مش هتخلفي غير لما تعملي تكميم وتخسي، أنا اللي ضايقني مش كلامها عن الخسسان وكدة، اللي ضايقني إنها كانت فاكرة إن المشكلة من عندي وإني لازم أخسلها، وأصلًا المشكلة كانت من عند جوزي وإحنا مخبيين والحوار حصل قدامه، ده كل الموضوع، تاني حاجة، هي بتقول إحنا بقالنا 6 سنين وبتقعدي معايا وحسستني إني واكلة وشاربة في بيتها، وده محصلش، إحنا خلال الـ 6 سنين ما شوفتهاش غير 4 مرات وكل اللي كان بينا فيهم سلام ربنا، بدليل يا أيتن وأنا أحب أفكرك إن آخر مرة كنا مسافرين على الطيارة رايحين السعودية وأنتي قاعدة في كرسي وجنبك فاضي وأنا في كرسي تاني وجنبي فاضي ومقعدناش جنب بعض علشان عارفة كويس أوي اللي حاصل، وإنتي يا أيتن كنتي عارفة كويس أوي إن الكلام كان عليكي من أيام برنامج نيشان ودخلتي وعملتيلي إلغاء متابعة، وبعدين عملتي متابعة تاني في نفس الدقيقة علشان كنتي فاكراني عملتلك بلوك، ولما كل واحدة فينا قعدت لوحدها ده علشان أنتي فاهمة كويس أوي إيه اللي في القلوب.”
سبب تعليق شيماء سيف على اعتذار أيتن عامر
واختتمت شيماء سيف حديثها: “أنا مش باكل عيش وملح مع حد وأنا شايلاله في قلبي حاجة ويمكن علشان كدة بخسر ناس كتير ومش ماشية بمبدأ إن في الشغلانة دي المصالح بتتصالح، لأ أنا مش كده، أنا عندي الدنيا يا أبيض يا أسود، أنا قلت في البرنامج إن أيتن اللي قالت كدة علشان فيه ناس تانية اتظلمت ولولا كدة مكنتش قلت اسمها ولا قلت هي مين، والسبب الأكبر بقى اللي خلاني رديت بالطريقة دي، إنها لما نزلت الفيديو أنا دخلت شوفت الكومنتات لقيت واحدة كاتبلها إن احنا فاهمين إنك قصدك تنصحيها وكدة، ف أيتن ردت وقالتلها اه دول هيخلوا الواحد يحرم!، لا يا أيتن أنا مرضتش أقول إنك بتكدبي علشان ما أحرجكيش لكن حقيقي حقيقي الكلام اللي أنتي قلتيه محصلش وعمومًا عند الله تجتمع الخصوم.”
