رفضت أحبسه احترامًا لابنه .. رنا سماحة تكشف تفاصيل جديدة عن أزمتها مع طليقها

كشفت المطربة رنا سماحة تفاصيل جديدة حول أزمتها مع طليقها الملحن سامر أبو طالب، بسبب عدم سداده نفقة نجلهما، مما تسبب في الحكم بحسبه لمدة 3 أشهر.

وكتبت رنا سماحة عبر صفحتها الرسمية على فيسبوك : "كنت مقررة من فترة إني مافتحش الموضوع ده وأسيب الرد قانوني فقط، ولكن طالما وصلنا لقلب الحقائق فأعتقد لي حق الرد".

وواصلت : "أولاً فيما يخص القضايا المتداولة في المحاكم فكلها تخص حقوق مالك سامر ابو طالب، يعني نفقة ومصاريف مدارس وغيرها، وبما إني متطلقة عن طريق الخلع فتنازلت عن كامل حقوقي".

وأكملت رنا سماحة : "هتكلم فيما يخص الحكم الصادر ضد أبو ابني سامر أبو طالب بالحبس، الحكم رقم 4713 لسنة 2026 حبس أسرة الهرم الصادر بتاريخ 26/9، وده كان حكم لامتناع الأب عن دفع نفقة ابنه وده مثبت رسميًا، وبالمناسبة دي مش أول قضية حبس تترفع على مدار سنتين كل مره بناخد النفقة على دفعات بعد رفع قضية حبس، لامتناعه عدة شهور عن الدفع وكله مثبت بالأوراق".

وأضافت مشيرة لتراجعها عن حبس طليقها : "ولكن القضية الأخيرة اتحكم فيها بالحبس ورغم ذلك ماسلمتش الحكم لتنفيذ الأحكام احتراماً لابني، وتركت الأمر للأستاذ سعيد بيومي المحامي اللي بدوره تواصل مع محامي أبو مالك، اتفقوا إنه يسدد وديًا من غير تنفيذ حكم الحبس".

وأردفت : "ومازال مصاريف مدرسة ابني العام الماضي لم تسدد للآن رغم الحكم النهائي، واللي صدر بعد استئناف أستاذ سامر وامتناعه أيضًا عن مصاريف مدرسة ابنه، وأيضًا هناك دعوة حبس تخص هذا الامتناع، حتى مسكن الحضانة ابني قاعد فيه بموجب حكم محكمة بعد استئنافات كتيرة ومحاولات وصلت لبيع البيت من طرف الأب،  أيضًا علشان ابنه مايقعدش في بيته".

وتابعت رنا : "وده مش كلام مرسل، ده كلام مثبت بقضايا وأحكام، وده بعد عدم التوصل لأي حلول ودية من طرف الأب، ورغم تدخل أكثر من شخص إلا إنه رافض يدفع المصاريف المحكوم بيها".

وعن رؤية نجله، كتبت سماحة : "أما بالنسبة لرؤية ابني، فعلى مدار الأعوام اللي فاتت أمام مرأى الجميع ورغم عدم إنفاق الأب، مالك كان بيروح أسبوعيًا لباباه وبيكلمه يوميًا فيديو كول،  ولكن كان عندي شرط وحيد إن فيه شخص معين ماينفعش يختلط بابني لأسباب يعلمها الجميع حفاظاً على سلامة ابني، ورغم الإتفاق الودي بيني وبين والد سامر أبو طالب على هذا الموضوع، اكتشفت ان ده بيتم من ورايا، ولما واجهتهم قالولي إنه ظرف طارىء ومش هيتكرر".

وواصلت : "وبرضو علشان ابني قعدت معاه وشرحتله إن أبوه أتجوز وهيبقى عنده أخت عشان ده الصح وده دوري كأم، ولكن مع ذلك لم تحترم رغبتي واتكررت أكتر من مرة واتفاجئت إن ابني بدأ يتغير سلوكه وبدأ يكذب عليا، ويقولي حاجات بدأت تتزرع في دماغه، ولأول مره بدأ ابني يكذب عليا وكل ده واجهت بيه الطرف الأخر".

وأضافت رنا سماحة : "وطلبت إن بعد كده رؤية مالك تكون في بيته أو ياخده يخرجه ويرجعهولي، لكن مش هينفع ينام بره البيت حفاظاً على سلامته النفسية، ولكن الأب رفض وامتنع عن رؤية ابنه بكامل إرادته مع استمرار اتصاله به فيديو يوميًا، ووعد الطفل المسكين يوميًا بإني هاجي أشوفك هاجي أخرجك، وكلها وعود كاذبة من أب لابنه".

وأردفت : "في كل الفترة الي فاتت الأستاذ سامر وزوجته مكرسين السوشيال ميديا للسب والتلقيح على أم ابنه على مرأى الجميع، ومع ذلك أنا ساكته ومابردش، ولكن من حقي أحمي ابني وأدور على حقوقه وهفضل بعمل كده لآخر يوم في عمري".

وأكملت رنا منشورها مؤكدة أنها لن تتطرق لتلك الأزمة مجددًا عبر مواقع التواصل الاجتماعي، حيث كتبت : "مش أنا اللي بسعى ورا التريند لأن الحمد لله تريند بشغلي، ولا أنا الأم الي ممكن تستخدم ابنها لأي أغراض، أنا أم بتدور على حق ابنها ودي أبسط حقوقي، ومحترمه جدًا قانون بلدي رغم كل الصعوبات اللي بقابلها كست بتقوم بدورين أم وأب، وفي النهاية ده آخر بوست هكتبه و آخر مرة هتكلم في هذا الشأن".

واختتمت رنا سماحة و "مع استمرار القضايا اللي بطالب فيها بحق ابني، اللي بالمناسبة هيكبر فعلاً وهيعرف كل حاجة، وهيفهم مين بيحبه ومين عامل نفسه بيحبه قدام الناس وعايز الشو والتريند".