بتول الحداد عن أزمة صناعة الدراما: "انت عايز تسكن الموزة اللي لسه مصاحبها"
خرجت الفنانة بتول الحداد عن صمتها لتضم صوتها إلي صوت مظلومي الوسط الفني، وذلك من خلال منشور عبر حسابها الرسمي على موقع تبادل الصور والفيديوهات إنستجرام.
بتول الحداد تطالب بأجور عادلة للفنانين الشباب
وعلقت بتول الحداد قائلة: "متنسوش وانتو بتشتكو يا صناع يا كبار يا محترمين من اجور الممثلين، تفتكرو ان عندكم منتجين فنيين بياكلو حق الممثلين الشباب والعمال والفنيين، وانكم مش بتقللو غير من اجور الغلبان والشاب وبس لدرجة ان الممثل بقى هو اللي بيصرف ع الدور بتاعه عشان انتو ياعيني شركة مش لاقيه تاكل بس لاقية تدي النجم ملايين وده حقه واجره بس حق الشباب ياخدو اجور عادلة متنسوش كمان وانتو بتعترضو على وجود عربيات للممثلين تبقو متبعتوش عربيات لمساعدين النجم اللي في بعض منهم اجره بيكون في السيزون بقد اجر ٦ ممثلين شباب واكتر، ومتنسوش برضه ورش الكتابة اللي اثبتت فشلها اللي بتكتبلكم دراما من بوستات الفيس بوك دراما تافهه وسطحية".
بتول الحداد تنتقد ترشيحات الممثلين من السهرات والإعلانات
واستكملت بتول الحداد حديثها قائلة: "ومتنسوش برضه تبطلو تسكنو الممثلين من السهرات والخروجات والتجمعات العائليه ولا من التيك توك والسوشيال ميديا والفيديوهات الكوميدية (اللي مبتضحكش) وتسيبو خريجين معهد فنون مسرحيّة والكليات الفنية المتخصصة يولعو بجاز، ومتنسوش تجيبو صحابكم ف ادوار الاباء والاجداد مع ان عندنا ممثلين مهمين وقاعدين ف البيت من الاجيال اللي فاتت، لما تتقو ربنا ف الشغلانة وتبطلو تشغلو منتجين فنيين حرامية وتبطلو تستغلو الشباب والعمال والفنيين وتبطلو ترمو ورق المؤلفيين الشاطرين اللي دي شغلانتهم ف الدرج وتجيبو عيال بتكتب عربي غلط اصلا فبوستاتهم يبقو دول مؤلفين المستقبل ولا تبطلو تنجمو اي حد عنده شوية فولورز ولا اي واحدة طلعت ف اعلان ولا صوره فتعجبكم الموزه فتعملوها نجمة".
بتول الحداد: "بطلوا تقولوا بلاش أصلهم مغضوب عليهم"
وأوضحت بتول الحداد مقصدها قائلة: "ولما تبطلو تقطعوا عيش الناس بدون سبب وفاكرين انكم ربنا وانكم اللي متحكمين ف الارزاق ... ولما تبطلو تستسهلو وتجيبو نفس الناس اللي اثبتت فشلها واللي كلنا عارفين بيعملو ايه وبيدفعو كام عشان يجيبو مشاهدات، وينزلهم اخبار وان لو مفيش سوشيال ميديا مكنش هيبقى ليهم وجود، ولما تبطلو تقولو على فلان لا بلاش ده اصله مغضوب عليه من فوق مغضوب عليه من الدولة يعني يا سازج يا تافه دولة كاملة هتغضب على ممثل ولا ممثلة ولا انت عايز تسكن الموزة اللي لسه مصاحبها ولا ابن سيادة فلان الفلاني اللي بيطلعلك تراخيص التصوير بنص تمنها !!، احترمو الشغلانه واتقو ربنا فالشغلانه هتقوم وهتقف على رجليها تاني وبطلو سرقه حقوق ومجهود وفلوس، واحترمو الجمهور وعقله وتطوره وقدموا دراما وفن ولما تعرفو ان اسمكم القوة الناعمة وان مفروض انكم محترمين ومؤثرين واساميكم هتتكتب ف التاريخ وقتها هيبقى ليكم كلمة وليكم موقف، المشكلة مش ف النظام المشكلة ان الكوادر بتاعتنا مبتتكلم بتقول حاضر ونعم عشان بيستسهلو لو النظام شايفك اد المسؤلية وبتحارب وتدافع عن قضيتك هيحترمك ويعملك قيمة .. انما طول مانت بتقول حاضر ياريس يبقى انت على راسك بطحه !!"
واختتمت بتول الحداد حديثها مؤكدة: "اسالو نفسكم كام منتج فني قديم محترم ودي شغلانته قاعد ف البيت، اسالو نفسكم كام ممثل من الاجيال اللي قبلنا اللي ميعرفوش غير دي شغلانة قاعدين ف البيت، اسالكم نفسكم مين ف المناصب العليا الفنيا ومين قاعدين ف البيت وانتو تحلو المشكلة، طول مانتو بتشغلو مرتزقة ع الصناعه متستنوش صناعه .. رجعو الناس اللي دي شغلتهم وبيفهمو فيها."
