مخرج فيلم اختيار مريم يقارن بين موقفه وموقف صناع فيلم سفاح التجمع عندما مُنع
خرج المخرج محمود يحيي مخرج فيلم اختيار مريم عن صمته ليقارن بين موقفه وموقف صناع فيلم سفاح التجمع عندما منع عرضه، وذلك من خلال منشور عبر حسابه الرسمي على موقع التواصل الإجتماعي فيسبوك.
محمود يحيي ينتقد تجاهل الوسط الفني له
وعلق محمود يحيي قائلًا: “لما اتمنع فيلم سفاح التجمع الوسط الفني كله طلع يوجب ويدافع عن الفيلم ومنتجه ويهاجموا اللي منعوه، نفس الناس اللي قبلها بفترة بسيطة نهشوا عرضي عشان طالبت بحق فيلمي الطبيعي أنه يوصل للجمهور!، هل منتج الفيلم دا عمله بفلوس بجد وأنا عملت اختيار مريم بفلوس بنك الحظ؟، ايه الفرق لما جهة رسمية تمنع فيلم زي كدا أو زي آخر أيام المدينة، وبينكم انتو كوسط فني وثقافي وصناعة مانعة اختيار مريم وسايبين منتجه يموت من الجوع ولا يولع مش فارقلكم؟ ليه المبادئ بتتجزأ؟ ليه ماحدش عايز يقول كلمة حق؟”.
استمرار أزمة محمود يحيي
في سياق آخر، قد خرج المخرج محمود يحيي عن صمته ليعلق على رد غرفة صناعة السينما حول أزمة عدم عرض فيلم اختيار مريم، وذلك من خلال مقطع فيديو عبر حسابه الرسمي على موقع التواصل الإجتماعي فيسبوك.
حيث قال محمود يحيي في الفيديو: “اتقال أن الغرفة مش جهة عندها صلاحيات تقدر بيها تمنع عرض الأفلام، فبالتالي الفيلم بتاعي المفروض إن هو مش ممنوع من قبل الغرفة، طيب فانا قلت أنا هاتصرف على أساس الكلام ده وهبدا أن أنا اشتغل على توزيع فيلم، رحت بدأت عملية التوزيع وعملية الشغل وتواصلت مع كل الشركات اللي موجودة وتواصلت مع كل السينمات بما فيهم السينما اللي وعدت إن هي هتدعم الفيلم وإن هي هتعرض الفيلم ولا حياة لمن تنادي، لا حياة لمن تنادي يعني ما فيش حتى ريجيكشن إيميل يعني كل الأبواب اتفقت في وشي، يعني فعلاً الغرفة قانونياً ما عندهاش الصلاحية ولا القوة إن هي تمنع عرض أفلام، لكن الوضع اللي موجود على أرض الواقع بيقول غير كده، الغرفة فيها كل المنتجين والموزعين المسيطرين على كل أدوات الإنتاج والتوزيع في السوق السينمائي المصري، فبالتالي الغرفة مش مضطرة إن هي تمنع الأفلام بشكل قانوني لو هي عايزة تمنع، يعني لو هي عايزة تمنع بشكل يعني خلينا نقول عرفي يكفي أنهم يقولوا إن الفيلم ده هنرفع إيدنا من عليه أو إن احنا مش هنتعامل عليه والفيلم محدش هيتعامل عليه، وده اللي بيحصل بالفعل مع أي منتج أو أي حد مستقل من بره الجروب، يعني أي حد ما عندهوش ما عندهوش إكسس للصناعة وللشلة بتاعت الإنتاج والتوزيع السينمائي، فده نظام معيوب، وده اللي أنا تكلمت فيه، وبغض النظر عن المشكلة اللي حصلت بيني وبين الغرفة، بغض النظر عن الموضوع مش شخصي مع محمود، هما ما عندهمش مشكلة مع محمود، إحنا ما فيش مشاكل بيني وبينهم شخصية”.
