"كنت هبقى دكتورة فاشلة".. ياسمين رحمي تكشف عن كواليس مسلسل بنج كلي |حوار
تصدرت الفنانة ياسمين رحمي تريند محركات البحث جوجل خاصة بعد أن ظهرت ضمن أحداث الحلقة السادسة من مسلسل بنج كلي، وهي تجسد شخصية الدكتورة إلهام طبيبة النسا والتوليد، وقد كشفت ياسمين رحمي عن كواليس المسلسل والمفارقات التي كانت تحدث لهما أثناء التصوير، وكل هذا في حوار خاص مع موقع نيوز رووم.
إليكم نص الحوار:
س: ما هو المميز في تجربة ال١٥ حلقة؟
ج: سهلة على المتفرج والموضوع مش مستاهل مط عشان نعمله 30 حلقة هو كده قصته ملمومة ومحكومة
س: في ناس كتير بتنتقد وجود مسلسل بنج كلي ويروا انه ينتقد الممرضين وطبيعة عملهم .. ما تعليقك؟
ج: اللي بيقولوه دي حاجة مستفزة جدًا كل مجال فيه الكويس وفيه الوحش إحنا مش مطلعين أن الممرضين وحشين أحنا مطلعين نماذج كويسة جدًا ونماذج وحشة وده الطبيعي في أي مهنة مش مطلوب أننا نطلعهم كلهم ملايكة، الممرض كمش نبي طبيعي يكون بيغلط أحنا بنناقش بيئة عمل أحنا بنعمل قصة درامية عشان نبرز المشاكل ونوجدلها حلول، ومافيش حاجة مثالية.
س: عرفنا أن كان حلم والدك تدرسي بـ كلية طب.. ما الذي جعلك ترفضي الرداسة والعمل فيه؟
ج: أنا بابايا دكتور أسنان وزي أي أب كان نفسه أبقى زيه واشتغل معاه، وماما كمان كان رأيها كده لأنها شايفة أن الفن كله مشقة وممكن اشتغل يوم وعشرة لا، طب الأسنان له كتالوج لكن الوسط مالوش كتالوج، أنا موافقتش أطلع دكتورة لأن مكنش ليا في العلمي خالص أنا بحب الحفظ وبحب الجغرافيا والتاريخ ومواد أدبي ومكنتش هعرف أجيب مجموع كبير ولو مجبتش مجموع كبير أنا شايفة أني مستاهلش أكون دكتورة.
س: بعد مسلسل بنج كلي.. ما الأفكار التي تغيرت في ذهنك عن مجال الطب؟
ج: أناعملت مشاهد صعبة شبه حقيقية، مسكت مشرط وفتحت بطن، على كمية الرعب اللي كنت حساها بجد الله يكون في عون الدكاترة الموضوع صعب ومشقة، أحنا ممكن نقول وقف هنعيد لكن هما الموضوع مافيهوش نعيد الغلطة بفورة، في حد تحت أيدك وتحت رحمتك، كنت عارفة أنه مجال صعب بس بعد المسلسل أتاكدت أن الموضوع صعب جدًا جدًا.
س: من ضمن كواليس تواجدكم في مستشفى بالتأكيد حدثت مواقف طريفة.. حدثينا عنها؟
أحنا كان معانا فريق طبي بيوجهنا ويساعدنا، كنا بنضحك لما نلاقيهم عاملين ماكيت لبطن بني أدم والمفروض نتعامل أنها بطن حقيقية، أحنا كان بيتطلب مننا انا وسلمى أبو ضيف ودياب أننا نعمل حوار جوا غرفة العمليات أثناء العملية وعشان نركز في حاجتين الموضوع كان صعب جدًا فكنا بنعيد كتير وبنضحك.
س: لو رجع الزمن، تفضلي تكوني الدكتورة ياسمين أم الفنانة ياسمين وليه؟
ج: أفضل أبقى الممثلة ياسمين أنا شايفة أني هنجح في مجالي لو كنت دكتورة مكنتش هنجح
