أميرة أديب عن دخولها الوسط الفني: "أمي كانت بتحاول تبعدني بشتى الطرق"
خرجت الفنانة أميرة أديب عن صمتها لتوضح مدى موافقة أهلها ودعمهم لها في مسيرتها الفنية، كاشفة عن محاولات عديدة قاموا بها لإبعادها عن الوسط، وذلك خلال لقاؤها مع برنامج on the road.
منال سلامة حاولت إبعاد أميرة أديب عن الوسط الفني
حيث قالت أميرة أديب: “دايمًا وأنا صغيرة لما كنت اتسأل عايزة تطلعي أيه وأقول ممثلة كانت ماما بتقولي عند أمك، وأنا بني أدمة عنيدة وهعمل اللي أنا عايزاه، الناس مش فاهمة ده، أنا شايفة أن أبويا أو أمي أو عمي مهما كانوا ايه هما عيلتي مش أكتر، أمي كانت دايما تزرع فينا أننا مش أحسن من حد، يعني أنا مش بشوف نفسي فنانة، بشوف نفسي بني أدمة شغلتها الفن، وأنا صغيرة كنت بروح لبابا المكتب ومكنتش فاهمة هو بيشتغل ايه كنت بشوفه بيشرب قهوة بس، أمي بقى أنا في مرة كنت بتفرج على كرتون مدبلج وماما كانت بدبلج صوت نملة، فأنا شبهت على الصوت فأخويا قالي دي ماما يا هبلة، فأنا قعدت أعيط أن لا ماما مش نملة وقتها بابا فاهمني يعني أيه ممثلة، ومن قبل كل ده أنا بحب الرقص والغنا”.
أميرة أديب تعلق على انتقادات الجمهور لها
في سياق آخر، كشفت الفنانة أميرة أديب أن ما يزعجها في أنتقادات الجمهور لها ليس الشتيمة أو التنمر عليها، ولكن ما يزعجها هو كبت الجمهور، وذلك من خلال تصريحات لها في اللقاء ذاته.
حيث قالت أميرة أديب في تصريحاتها: "النقد مش هو اللي بيضايقني، ولكن أن الناس مكبوتة لدرجة إنها بتستفز من حد بيعمل شيء هو بيحبه ده اللي بيضايقني، مش إن أنا بتشتم، يا عم ما اتشتم، اللي أنا عاجباه أحب أنه يبقى حواليا، واللي مش عاجباه أحب يبعد عني، أنا حاسة أن الغريب عني ضدي، فالأحسن لكم أبقى دكتورة وحياة الناس في إيدي ولا أبقى ممثلة، أه حياة الناس في إيدي بس مش هموت حد".
رحلة أميرة أديب مع الاكتئاب
في سياق آخر، قد قررت الفنانة أميرة أديب أن تشارك جمهورها رحلتها مع الاكتئاب التي ظلت لمدة عامين متواصلين، وذلك من خلال مقطع فيديو عبر حسابها الرسمي على موقع تبادل الصور والفيديوهات إنستجرام.
وأوضحت أميرة أديب قائلة: “أنا بقالي سنتين عندي اكتئاب، سنتين بقعد في السرير مش قادرة أقوم وبقوم بالعافية ودماغي مليانة بأفكار سلبية فقط لا غير وأنا البنت اللي كانت دايما شايفة الحياة بطريقة كرتونية جدا وبإيجابية وكنتوا كلكوا بتقولوا بناخد منك طاقة إيجابية، منظوري للحياة اختلف تماما وللأسف كان عندي أفكار وحشه أوي وكنت عايزة أوذي نفسي ودا مكانش عدم إيمان بالعكس يمكن إيماني هو اللي خلاني معملش كده ودي كانت خضة بالنسبالي لما كنت بسمع ناس كتير عندها اكتئاب مكنتش مستوعبة أو فاهمة وكنت حاسه الناس متضايقة شوية لكن إحساس الضيق العادي الناس بتحسه كتير غلط”.
