أحمد موسى ينتقد فصل مدير مطعم بسبب الصلاة: «لازم يرجع»

انتقد الإعلامي أحمد موسى، التعامل مع واقعة متداولة بشأن سيدة أرادت أداء الصلاة داخل أحد المطاعم في أحد المولات بمدينة 6 أكتوبر، معتبرا أن ما حدث كان يستوجب الاستماع إلى جميع أطراف الواقعة قبل اتخاذ أي إجراءات، ومحذرا من الاستجابة لضغوط مواقع التواصل الاجتماعي.

أنا عارف ديني كويس ومش محتاج دروس

وقال أحمد موسى عبر برنامجه “على مسؤوليتي”: «قبل ما أتكلم، أنا عارف ديني كويس قوي بفضل الله سبحانه وتعالى، عارف تعاليم الدين كويس قوي، مش محتاج دروس من حد».

وأضاف: «بتكفروا؟ هتكفروا، وأنتم متكفرون من التسعينيات، فعادي يعني التكفير عادي بالنسبة لكم».

تفاصيل الواقعة من وجهة نظر أحمد موسى

وتحدث موسى عن الواقعة قائلا: «في أحد المطاعم، في أحد المولات الشهيرة هنا جنبنا في 6 أكتوبر، حصلت واقعة، اللي هي إيه؟ حد بيقول: أنا عايز أصلي».

وأضاف: «أنا عايز أصلي في مكان للصلاة، مش في قلب مطعم. وإنت بتصلي ولا بتتباهى؟ بتصلي ولا بتتباهى قدام الناس بالصلاة؟ بتصلي للمولى سبحانه وتعالى، فرض صليه».

وأوضح أن وجود مكان مخصص للصلاة يجعل اللجوء إليه هو الخيار الطبيعي، قائلا: «طيب الكلام ده يبقى إمتى؟ لو مفيش جامع أو مصلى قريب».

وتابع: «المصلى كانت على خمس خطوات، مش ثلاثة أربعة كيلو، يعني خمس خطوات، يعني أروح أصلي في المكان المخصص». وأشار إلى أن هناك مكانا مخصصا للصلاة في الموقع، قائلا: «هناك مكان مخصص للصلاة».

هو حد هنا بيمنع حد من الصلاة؟

وشدد موسى على أن الواقعة، وفق ما ذكره، لا تعني منع السيدة من أداء الصلاة، قائلا: «هو حد هنا بيمنع حد من الصلاة؟ إطلاقا، إطلاقا». وأضاف: «لو مفيش مكان هنا نتكلم بقى، نقول مكان إزاي؟ ضابط إزاي؟ ضابط شرعية للصلاة في مكان عام إزاي؟».

وأكد أنه لا يتحدث باعتباره رجل دين، موضحا: «مش أنا اللي بقول، أنا بقول رجال الدين اللي يقولوا، وعلماء اللي يقولوا».

إشادة بتعامل مدير المطعم

وأشاد موسى بطريقة تعامل مدير المطعم مع السيدة، بحسب ما ورد إليه من تفاصيل الواقعة، قائلا: «مدير المطعم، كل الناس بتتكلم عنه كرجل محترم، وتعامل مع السيدة اللي عايزة تصلي في قلب المطعم بمنتهى الاحترام».

وأضاف أن مدير المطعم وجه لها حديثا بشأن وجود مكان مخصص للصلاة، قائلا: «الجامع، مكان الصلاة ناحية دي بس» وتابع: «الست دخلت في الصلاة، فخلاص خلص الموضوع».

انتقاد سرعة انتشار الواقعة عبر السوشيال ميديا

وانتقد موسى الطريقة التي انتشرت بها الواقعة على مواقع التواصل الاجتماعي، متسائلا: «السوشيال ميديا دي تقلبت فيه في ثواني إزاي؟ مين سخن الناس؟ مين هواها؟».

وقال: «الراجل يمنع؟ الراجل ممنعش»، موضحا أنه لا يعرف مدير المطعم ولم يسبق له الذهاب إلى المكان، وأن حديثه يستند إلى تفاصيل الواقعة التي تناولتها مواقع التواصل.

وقال موسى: «إحنا عارفين ربنا، إحنا مش عارفين ربنا؟ إحنا عارفين ربنا أكتر منكم، إحنا بندافع عن ديننا أكتر منكم». وأضاف: «إحنا نحافظ على الدين وعارفين كويس قوي الدين بيقول إيه». وتابع: «في مكان للصلاة يبقى مكان للصلاة، مش في أي مكان أفرش، إلا لو مفيش مكان».

ده راجل بقاله 11 سنة

وطالب موسى بإعادة مدير المطعم إلى عمله، قائلا: «هذا الرجل يرجع مكانه، يروح أحسن مكان له كان فيه». وأضاف: «ده راجل بقاله 11 سنة، في أول لحظة تقول له مع السلامة، امشي عشان تحمي نفسك؟ مش هتحمي نفسك». وتساءل: «تحمي نفسك من إيه؟ يعني ضحيت بالراجل اللي شايلك 11 سنة وتمشيه؟».