مصطفى حدوتة يكشف أول مكالمة مع عمرو دياب: قالي متسمعش لحد
كشف الشاعر مصطفى حدوتة، كواليس التعاون مع الهضبة عمرو دياب، قائلا: «كنت بكتب من وأنا صغير، حاولت أوصل لناس كتير بس طبعا كان صعب، لأن المغني بيقابل طول الوقت ناس تبعتله وبيشوف كتير وغصب عنهم بيتجاهلوا، واختارت أبدأ مع حد لسه بيبدأ عشان نكون احنا الاتنين صغيرين».
أغنية بنت الجيران لحسن شاكوش
وأضاف، خلال لقاءه ببرنامج «الستات»، المذاع على قناة «النهار»: «أغنية بنت الجيران لحسن شاكوش هي أنجح واحدة، كنت اشتغلت كام أغنية قبلها».
كواليس التعاون مع عمرو دياب
وتابع: «أغنية يا قمر لو في اتنين منك لعمرو دياب عملتها بعد ما اشتغلت كذا أغنية وبقى في تواصل بيني وبين عمرو دياب، عمرو دياب بيسمعنا وأول مكالمة كانت بينا قالي عايزك زي مانت متسمعش لأي حد بيقول حاجة من اللي حواليك لأن الملحنين والناس اللي بتشتغل معايا بتقول إنه بيحب كذا وبيحب كذا، قالي ملكش دعوة بحد عايزك زي مانت».
في وقت سابق، أثار الشاعر والملحن مصطفى حدوتة حالة من الجدل الواسع على منصات التواصل الاجتماعي، بعد تصريحاته التي أكد فيها تفوقه الرقمي والفني على ساحة صناعة الأغنية في مصر.
وخلال لقائه ببرنامج "الستات" المذاع عبر قناة "النهار"، مع الإعلامية سهير جودة، أكد حدوتة أن الأرقام والنتائج التي حققها تعكس حجم إنجازاته.
التشبيه بالنادي الأهلي: أنا بطل الدوري
وردا على سؤال الإعلامية سهير جودة حول ما إذا كان وصفه لنفسه بـ "أقوى شاعر في مصر" نابعا من الثقة أم مجرد إحساس، أجاب حدوتة: "آه ينفع أقول، زي الأهلي لما ياخد بطولة الدوري بيقول أنا بطل الدوري".
وتابع حدوتة: "لما يبقى عنده رصيد سنين ورا بعض بياخد دوري وكأس، يبقى طبيعي يقول أنا أقوى نادي.. ولو خد كأس العالم يبقى بطل العالم، مش هيقول أصل فيه ريال مدريد"، مؤكدا أن هذا التقييم لا يقلل من قيمة الأساتذة الكبار الذين يكن لهم كل تقدير، لكنه لا يمنعه من إعلان قوته خاصة وأن الأرقام هي من تتحدث.
أرقام مليارية وتحدي الجيل
واستعرض مصطفى حدوتة خلال اللقاء كشف حساب لنجاحاته منذ انطلاقته في عام 2019، مشيرا إلى أن نجاحه تخطى حدود جيله ووصل إلى أرقام لم يحققها من سبقوه، كاشفا عن قائمة المشاهدات المرعبة لأعماله، والتي جاءت كالتالي:
بنت الجيران: أكثر من مليار مشاهدة
عود البطل: 500 مليون مشاهدة
مسيطرة: 370 مليون مشاهدة
وسع وسع: 320 مليون مشاهدة
مخاصماك: 280 مليون مشاهدة
وعلق حدوتة على هذه الأرقام: "فيه ناس بتحتفل بـ 15 مليون، وأنا عامل 300 مليون.. فلما اللي جايب 95% بيسقفوا له، بس اللي جايب 98% مش بيقولوا إنه الأفضل.. فأنا بقولها يا جماعة أنا الأفضل".
