في أول حوار له بعد نجاح تحت السن.. يحيي إسماعيل يكشف الكواليس لنيوز رووم
أجرى موقع نيوز رووم حوار صحفي مع المخرج يحيي إسماعيل بعد نجاح مسلسل تحت السن وتصدره التريند، التي حقق نجاحًا غير مسبوق، حتى نكشف من خلال هذا الحوار كواليس المسلسل وطاقم العمل.
س:كيف جاء اختيارك للشخصيات جودي وجايدا وترنيم وجاسيكا وريم؟ ولماذا؟
ج: كل الناس بعملهم أوديشن، وبشوف أكتر حد واصل لشكل الشخصية، كنت شايف كل شخصية من منظور معين يعني ريم كنت عايز شخصية عينيها واسعة عنده اكتشاف للدنيا، مريم كنت عايز واحدة بريئة وبتتفتح عالدنيا وكان في كذا حد لحد ما استقرينا على جاسيكا، وداليدا كنت عايز واحدة غاضبة وجواها طباع ولد ولكن مش عايز اروح للحتة الكليشيه بتاعت البنت المسترجلة فجبتها وشه ملائكي وقمورة، جنا كنت عايز شخص حاد وكله بالمسطرة، دور ملك كنت عايز واحدة مستفزة في طريقة اكلها وكلامها، وفي نفس الوقت غلبانة.
س: ما هي التحديات التي واجهتك أثناء تجهيزات تحت السن؟
ج: التصوير في مصر عامة تحدي، هو خد وقت كتير في الكتابة وكانت بيني أنا ومحمد السوري ومينا البباوي، بجانب تعليقات فريق مراجعة الاسكريبتات من منصة شاهد وهما نجلاء الحديني وسمر عبدالناصر وكان ليهم تعليقات ايجابية ومفيدة للعمل، كانت ورشة عمل دائمة بينا.
س: ما هي رسالتك لأبطال العمل "جاسيكا وجودي وجايدا وريم وترنيم"؟
ج: هما حاليًا بيكلموني يشكروني وأنا بقولهم أنتوا اللي عملتوا ده ذاكرتوا وكنتوا قد المسئولية، بس أنا بستريح للممثل اللي نسخة الاسكريبت بتاعته مليانة تعليقات وأسئلة ومذاكرة، وبيسألني دايما في الشخصية ودوافعها وهما عملوا ده.
س: ما هي رسالتك للجمهور من خلال تحت السن؟
ج: أنا مبديش رسالة للجمهور وبعترض على المسلسلات اللي بتدي رسالة، أنا بعمل قصة حلوة وشخصيات مدروسة وتكون فيها تحول أو استيعاب شئ عنه أو عن الحياة، الرسالة هو كل واحد من الجمهور بيشوفها من وجهة نظره، لكن أنا مش قاصد أوصل رسالة.
س: كان هناك العديد من المطالبات بإيقاف عرض المسلسل، كيف واجهت ذلك؟
ج: الحمدلله التعليقات الإيجابية كانت أكتر من السلبية، ومعنى ان حصل انقسام كده ده معناه أن المسلسل بيستفز حتة حقيقية، اتضايقت من دعوات الوقف المفروض نناقشهم وكتير من الناس اللي دعت بده مكملوش المسلسل للأخر، أحنا خلال رحلة المسلسل شوفنا ازاي كل حد ضحية وأزاي اللي غلط بياخد جزاءه، والمجتمع المنفتح المقروض يناقش الحلو والوحش ولكن مطلعش الوحش في صورة بطولية.
س: كيف توقعت ردود الفعل، وما أكثر رد فعل أثر فيك؟
ج: مكنتش متوقعها، أنا مبسوط لكن مكنتش عارف الناس هتستقبله ازاي وبرمي المسلسل في البحر وبشوفه، واللي بسطني أن الناس ناقشت كل تفصيلة في الشخصية وده من أكتر المسلسلات اللي اشتغلتها والناس ناقشته بالشكل ده، فده بسطني أن التعب اتشاف.
س: ما الذي جذبك لمناقشة موضوعات تخص سن المراهقة؟
ج: منصة شاهد هما اللي كان عندهم الهدف ده، اللي شجعني أن ولادي في مرحلة عمرية قريبة فحاسس أني فاهم اللغة والطريقة والتفكير، هما مش في المشاكل دي ولكني فاهم وقريب من السن ده.
س: المشاهد كانت إلي حد ما قاسية.. كيف استطاعت كمخرج أن تبرز المشاهد بدون وجود أشياء منفرة او تعتبر +18؟
ج: المشاهد دي فيها تحدي للمخرج وبتطلع حاجة حلوة لما بنكون مش عايزين نبين ده ولكن نحسس المشاهد بيه، كنت مركز أني أبين الإحساس اللي ورا المشهد.
س: ما هي مميزات وسلبيات تجربة ال12 حلقة؟
ج:مش شايف فيها سلبيات، التصوير بياخد وقت ومجهود كبير فكل ما نقل ونطلع جودة ده أحسن.
س: انت كنت مخرج مسلسل توابع، حاسة أن اختياراتك كلها مختلفة وبعيد عن التقليدي ما السبب وراء هذا؟
ج: بركز على القصة يكون فيها نقاط تحول بشكل يجعلها حقيقية، ودوافعها النفسية مظبوطة والقاسم المشترك بين كل المسلسلات أن الشخصيات والقصة مظبوطة.
س: هل السوشيال ميديا كانت سبب في نجاح المسلسل ولا جعلت الرأي العام ضد المسلسل؟
ج: السوشيال ميديا بقيت جزء من الكلام عن المسلسل، وهي سلاح ذو حدين بتدي فرصة المتابعة والمناقشة وأديت فرصة لناس تنتقد وده مش وحش لأني بدور على الانتقادات دي بشكل موضوعي عشان أعرف أيه المشاكل اللي عندي ولكن في ناس بتنتقد من أجل الفرقعة وركوب التريند، ناس بتحط نفسها المدافع عن القيم عشان يتشهروا، السوشيال ميديا مكان لكل الناس ومحتاجة تنظيم مين يتكلم وايه يتقال.
س: ما هو أكثر مشهد كان صعب في إخراجه؟
ج: مشاهد الضرب في الحمام كان معانا حد بيعمل ديزاين الخناقة، وجايدا منصور اتبهدلت لأنها كانت بتضرب من البنات، ومستر شاكر ومريم وكله كان في نفس اليوم.
س: بعد نهاية المسلسل الناس قالت الحل كان في تتر النهاية، كنتوا قاصدين ولا جات صدفة؟
ج: مكناش قاصدين ده ولكن كنا نقصد أن لك شخصيات المسلسل تبقى باينة في التتر وكل المتهمين كأنهم واقفين حواليها بيحلوا لغز القضية.
س: هل نهاية المسلسل كانت محسومة من الأول أم عدلتوها بعد عرض المسلسل؟
ج: كل حاجة كانت محسومة قبل نهاية العرض، الكتابة خلصانة من زمان من قبل بداية التصوير، وكان عجبني موضوع أن الأم تكون مخططة كل حاجة من البداية وزقيت الكتابة في الحتة دي.
س: هل بتجهز أي عمل درامي خلال الفترة القادمة؟
ج: في مناقشات على كذا حاجة ولكن لسه متفقناش بشكل محدد.
