نبيل عيسى يكشف تفاصيل شغفه بالطبيعة والحيوانات ورحلة الغوريلات في أوغندا

تحدث الفنان نبيل عيسى خلال استضافته في بودكاست "شقة التعاون" مع الفنان حسام داغر عن جوانب مختلفة من حياته، وكشف تفاصيل شغفه بالطبيعة وتربية الحيوانات وتجربته مع الغوريلات في أوغندا، موضحا العديد من المواقف التي عاشها.

ذكريات الروف القديم والبغبغانات

قال نبيل عيسى: "كان هناك حاجات كتير جدا صراحة لغاية دلوقتي مفتقدها.. البغبغانات، أنا عندي زرع أخدته معايا وجبت روفاني وظبطت كل حاجة، بس مش نفس روف بلبل الأولاني، بقى أكبر"، وأضاف: "كان عندي محمية، وشجر مانجا قافل عليك وطيور.. كنت باكل البغبغانات وبتيجي تاكل"، وأوضح: "البغبغانات اللي عندي نوع بنك رينج هندي، خضراء بطوق بينك، وموجودة وايلد في المعادي والزمالك وجاردن سيتي".

شغفه بالزرع ونقل الأشجار العملاقة

وتابع نبيل عيسى: "أنا عامل غابة بجد، عندي شجر 7 متر و10 متر في الروف، طلعتهم بونش وفي بوت فخار قد كده طن لوحده"، وأضاف: "فكينا الشجر من البوت.. أنا نقلته في الشتاء عشان الشجر ما يبقاش فيه ورق فتقدر تخلعه".

حبه للحيوانات وقطته سوسو

وقال نبيل عيسى: "عندي قطط وكلاب وكل حاجة"، وتحدث عن قطته "سوسو" قائلا: "بقالها 13 سنة معايا، مكتئبة اليومين دول عشان نقلنا البيت.. هي فرعونية، إيديها طويلة ومخططة"، وأضاف: "جتلي مرة كاميلين كبيرة قد كده عايشة وايلد في المعادي، صورتها".

تجربة الغوريلات في أوغندا

وعن رحلته إلى أوغندا برفقة الفنان محمود حميدة والفنان صدقي صقر، قال نبيل عيسى: "رحنا بويندي دي حدود بين الكونجو ورواندا وأوغندا.. عملنا تراكينج مع الغوريلات، بتمشي 3 ساعات جوه الغابة جبال مع ناس من الجيش بتوع المحمية"، وتابع: "دخلنا قعدنا مع العيلة، السيلفر باك الجوريلا الدكر الكبير ده قد كده، لازم نلبس كمامات عشان ما نعديهمش، وقبل ما يجي الغوريلا لازم تعمل تنحنح عشان تطمنه"، واختتم حديثه قائلا: "الغوريلات دي مش موجودة غير في 3 مناطق في العالم، ودي أغلى تراكينج، وبياخدوا شهادة بيها، عالم تاني.. بني آدمين أكتر مننا، مشاعرهم واضحة".