بعد أزمته المالية الاخيرة.. علي قدورة:"ربنا سخرلي جنوده في الأرض ووقفوا جانبي"
خرج مطرب المهرجانات المعتزل علي قدورة ليتوجه بالشكر لجمهوره الذي يسانده دومًا وكان سبب في خروجه من أزمته المالية الاخيرة، وذلك من خلال مقطع فيديو له عبر حسابه الرسمي على موقع التواصل الإجتماعي فيسبوك.
علي قدورة يوجه رسالة لجمهوره
حيث قال علي قدورة في الفيديو: “الحمد لله على نعم ربنا وتقلب الحال من العسر لليسر في ثانية، طالما العبد واثق فيه ومؤمن وراضي، ربنا سخرلي جنوده في الأرض ووقفوا جانبي بدعم الناس المستمر، شكرًا ليكم وربنا يراضيكم، ده مثال حي لأي حد كان بيعمل حاجة غلط وعاوز يتوكل على الله بالحلال، ودي رسالة لكل شاب إنه يعمل الصح ويبعد عن الغلط.”
استياء علي قدورة من تعثره ماديًا
في سياق آخر، قد خرج مطرب المهرجانات علي قدروة عن صمته خاصة بعد 3 سنوات من الاعتزال، ليكشف عن استيائه الشديد من تعثره ماديًا، مؤكدًا أنه لم يتخذ قرارًا بالعودة إلي الغناء بعد اعتزال 3 سنوات، وذلك في مقطع فيديو عبر حسابه الرسمي على موقع التواصل الإجتماعي فيسبوك.
وقال علي قدورة معلقًا: “أنا عارف إن فيه ناس كتير هتشوف الفيديو ده وهيتكلموا وهيسألوا، بحكم إني حد على السوشيال ميديا مينفعش أكلم نفسي بس، أنا لحد دلوقتي ماخدتش أي قرار وربنا هو أعلم وأدرى باللي فيا، أنا حاولت ومحدش كلمني علشان أبطل علشان يكلمني علشان أرجع، أنا ماخدتش أي قرار خالص وربنا يثبتني بس أنا في موضوع صعب أوي، ومخدتهاش حجة من 3 سنين أنا أكيد مريت بحاجات أكتر من كده ومريت بظروف أكتر من كده وبيتهيأ لي إن دي مش حجة، تاني حاجة مفتكرش إن حدّ مدّ لي إيده لما بطلت وأكلني لقمة ولا قالي تعالى أشغلك في شركتي أو تعمل مشروع، ملقتش حد يقولي أي حاجة، 90% من اللي بيشوفوني بيفتكروا إن فلوس المهرجانات بصرف منها وبناء على ده كل الرسائل عندي عايزين مساعدات والله ما حد عايز مساعدة غيري، أنا مش بشتكي ولكن بفهمكم وجهة النظر، أنا مش عايز ولا هقبل حاجة من حد، أنا فتحت مشروعي واشتغلت زي الفل وبعدين الدنيا اتكحرتت خالص واتداينت والدنيا اتخربت معايا، والمحل هقفله آخر السنة دي لو مكنش بكرة، محدش أدرى بعباده غير ربنا، وأنا بكلم نفسي بصوتين وجوايا 2 بيتكلموا وبيحاربوا في بعض وأنا مهزوم وسطهم ومفيش كلام عارف أقوله، بس أنا حاولت في عز شهرتي وفي عز ما كنت مسموع ومش مغصوب على حاجة، ولكن أنا بجد تعبت واتداينت وخلاص بتشاف وحش لأن إحنا فعلًا في زمن بتاع مظاهر وفلوس، أنا مش طايق كلمة ولا نصيحة من حد، أنا أقرب واحد لنفسي.”
